دامەزراوەی سەرۆک جەلال تاڵەبانی بەبۆنەی جەژنی چوارشەممەی سور پیرۆزباییەک ئاراستەی ئێزیدییەکان دەکات

جەژنی چوارشەممەی سور، لە ئێزیدییەکانی کوردستان و جیهان بەگەرمی پیرۆزدەکەین.
بە دید و رێبازی سەرۆک مام جەلال درێژەپێدەری کارکردن بۆ پێکەوەژیان دەبین؛ لەپێناو فەراهەمکردنی ئاشتی و پێکەوەژیانی ئایینی لە کوردستان و عێراق و چەسپاندنی گیانی تەبایی و یەکترقبوڵکردن لە کۆمەڵگەدا.

 بەداخەوە لە رابردوودا؛ بەهۆی داگیرکاریی تاقمی تیرۆریستیی داعش و کردەی جینۆسایدکردنی کۆمەڵی ئێزیدییەکان وەک رەسەنترین کۆمەڵگە، لەسەر زێدی خۆیان؛ زۆرێک لە خوشک و برایانی ئێزیدیمان؛ شەهیدکران و بەشێکیش لە ئێزیدییەکان لە کچ، ژن و منداڵ بە هەمەجییەتی چەرخی دواکەوتووی؛ وەک کاڵا لە بازاڕەکانی موسڵ و رەقە فرۆشران؛ ئەوەش ستەمکاریی گەورەبوو کە بەرانبەر بە ئێزیدییەکان لەم جیهانە نوێییە کرا؛ داوادەکەین هەردوو حکومەتی هەرێم و بەغدا جدی تر کار بۆ دۆزینەوەی چارەنووسی ونبووەکان لە ژن، کچ و منداڵانی ئێزدی بکەن؛  کۆمەڵی نێونەتەوەیش وەک پارێزەر رۆڵبگێرێت بۆ پاراستنی ئێزدییەکان؛ لە گەڕاندنەوەی خۆشک و برایانمان بۆسەر خاک و واری ژیانی دیرۆکی خۆیان.

لە کۆتایدا دووبارە، جەژنی چوارشەممەی سور لە کۆمەڵگەی ئێزیدییەکان پیرۆزبێت و هیوادارین ئەم جەژنە ببێتە هەوێنی پێکەوەیی، چەسپاندنی ئاشتی و سەقامگیری گەل و وڵات.

باڵیۆز د.محەمەد سابیر
سەرۆکی دامەزراوەی سەرۆک جەلال تاڵەبانی