پەیامی دامەزراوەی سەرۆک جەلال تاڵەبانی لە رۆژی شەهیدی یەکێتیدا

2026-11-22
پەیامی دامەزراوەی سەرۆک جەلال تاڵەبانی لە رۆژی شەهیدی یەکێتیدا

بەبۆنەی رۆژی شەهیدی یەکێتیی نیشتمانیی کوردستان-ەوە، لە دامەزراوەی سەرۆک جەلال تاڵەبانی-یەوە سەری رێز و نەوازش لەبەردەم گڵکۆی پیرۆزی سەرجەم شەهیدانی رێگەی رزگاریی کوردستان دادەنەوێنین و سڵاو و دروود دەنێرین بۆ رۆحی پاکی هەموو ئەو قارەمانانەی کە بە خوێنی خۆیان مێژووی پڕ لە سەروەریی یەکێتی و گەلەکەمانیان نەخشاند.

رۆژی٢١ی تشرینی دووەم "رۆژی شەهیدانی یەکێتی"یە، یادێکی مەزن و پڕشکۆیە لە مێژووی و سەروەریی و خەباتی بەردەوامی نەتەوەی کورد و یەکێتیی نیشتیمانیی کوردستان و سەرۆک مام جەلال، هەرئەمەش وای کرد یەکێتی ناوی حزبی شەهیدانی لیبنرێت.

رۆژی شەهیدی یەکێتی، وێستگەیەکی مێژوویی و پڕ شکۆیە بۆ بیرهێنانەوەی قوربانیدان و خۆڕاگریی ئەو مرۆڤە مەزنانەی کە لەپێناو ئازادی، دیموکراسی، مافی چارەی خۆنووسین، پاراستنی خاک و کەرامەتی نەتەوەکەماندا، گیانی خۆیان بەخت کرد، ئێمە لە دامەزراوەی سەرۆک جەلال تاڵەبانی خوێنی شەهیدانمان لەیاد ناکەین و لەگەڵ ناوهێنانی هەرشەهیدێکدا لەسەر پێ دەوەستین و دەست لەسەر دڵمان دادەنێین، خۆمان بە قەرزاری یەکبەیەکیان و کەسوکارەکانیان دەزانین، چونکە ئەوان یەكێتییان لە دڵیاندا هەڵگرت بەڕاستی بۆ میللەت جەنگان و گیانی خۆیان بەخت کرد.

لەم رۆژەدا رایدەگەیەنین خەبات و قوربانیدان بەردەوامیمان دەبێت تا بەدیهێنانی یەکجارەکی ئاوات و خۆزگەی شەهیدان و داواکاریی کەسوکارە سەربەرزەکانیان.

سەری رێز و نەوازش بۆ شەھیدانی یەکێتی و ھەموو شەھیدانی دیکە رێگەی رزگاریی کوردستان دادەنوێنین، بەرز و پرسەروەری بێت رۆژی شەھیدی یەکێتی.

باڵیۆز د. محەمەد سابیر
سەرۆکی دامەزراوەی سەرۆک جەلال تاڵەبانی
٢١ی ۱۱ی ٢٠٢٦

​
​

 

زیاتر بخوێنەرەوە

Copyright © 2026 . PJT Foundation. All right reserved