رۆڵی سیاسیی سەرۆک مام جەلال و پەیوەندییە نێوخۆیی و دەرەکییەکانی لە ساڵانی ١٩٧٥-١٩٩١ لە تێزێکی دکتۆرای زانکۆی کۆیەدا

ڕۆژی پێنجشەممە ٢٢ی شوباتی ٢٠٢٤، بە ئامادەبوونی سەرۆکی زانکۆی کۆیە بەڕێز پ. ی. د. محەمەد حەسیب و هەرشۆ تاهیری، نوێنەری دامەزراوەی سەرۆک جەلال تاڵەبانی و ئەندامانی ئەنجوومەنی زانکۆی کۆیە و مامۆستایانی زانکۆی کۆیە،گفتوگۆی تێزی دکتۆرا خوێندکار "کێوان جەبار عەبدوڵڵا" سەبارەت بە ژیان و رۆڵی سیاسیی سەرۆک جەلال تاڵەبانی بەناونیشانی "جەلال تاڵەبانی؛ رۆڵی سیاسی و پەیوەندییە نێوخۆیی و دەرەکییەکانی ١٩٧٥-١٩٩١" بەڕێوەچوو.

ئەم توێژینەوەی بەشی مێژووی زانکۆی کۆیە یەکەمین توێژینەوەیە لە بواری مێژوو و لە ئاستی کوردستان و عێراق کە هەوڵیداوە ئاکادیمییانە لایەنی سیاسیی ژیانی سەرۆک جەلال تاڵەبانی و رۆڵی لە رەوتی جوڵانەوەی رزگاریخوازیی کوردستان لە نێوان ساڵانی ١٩٧٥ بۆ ١٩٩١ بخاتەڕوو.

 بەڕێز پ. د. هۆشمەند علی محمود، سەرپەرشتیاری توێژینەوەکە باسی لەوەکرد ئەوان لە دوو لایەنەوە بۆیان گرینگ بووە توێژینەوەیەکی لەمجۆرە سەبارەت بە ژیانی سیاسیی سەرۆک جەلال تاڵەبانی ئەنجام بدەن یەکەم لەبەرئەوەیکە سەرۆک تاڵەبانی دامەزرێنەری زانکۆی کۆیە بوو و هاوکات ناوبراو ڕۆڵێکی دیار و بەرچاوی لە جوڵانەوەی رزگاریخوازیی کوردستان هەبووە و سیمایەکی دیاری ئەو جوڵانەوەیەشە.