دامەزراوەی سەرۆک جەلال تاڵەبانی و زانکۆی کۆیە یاداشتنامەی لێکتێگەیشتن واژۆ دەکەن

ڕۆژی سێشەممە رێکەوتی ۲ی ئایاری ٢٠٢٣ باڵیۆز د. محەمەد سابیر، سەرۆکی دامەزراوەی سەرۆک جەلال تاڵەبانی یاداشتنامەی لێکتێگەیشتن لەگەڵ پ. ی. د. محەمەد حەسیب، سەرۆکی زانکۆی کۆیە واژۆ دەکات.

لە یاداشتنامەکەدا هاتووە: "دامەزراندن و بەهێزکردنی هەماهەنگی لەنێوان دامەزراوەی سەرۆک جەلال تاڵەبانی و زانکۆی کۆیە لەبواری هاوکاریی گەشەپێدان، ئاڵوگۆڕی زانیاری، ئەزموون و پڕکردنەوەی کەلێنەکان لەبوارە جیاوازەکاندا بۆ پێشکەشکردنی خزمەتگوزارییە پێویستییەکان و دابینکردنی ژینگەیەکی گونجاو بۆ خوێندکاران".

باڵیۆز د. محەمەد سابیر باسی لەوەکرد: "ئامانج لەم یاداشتە پەرەپێدانی هاوبەشی ستراتیجییە لەنێوان هەردوو لایەندا و ئاسانکاری کردنە بۆ ڕێکخستنی میکانیزمی هاوکاریی بەردەوام و درێژخایەن، هەروەها پشتگیریکردن لە پەرەپێدانی پرۆژە و چالاکییە هاوبەشەکان و کۆکردنەوەی سەرچاوەی پەیوەندیدار و دابینکردنی هێڵکارییەکی فراوانی بەرپرسیاریەتییەکان".

لە کۆنگرەیەکی رۆژنامەیدا سەرۆکی دامەزراوەی سەرۆک جەلال تاڵەبانی وتی: "لە داهاتووەیەکی نزیکدا دەستدەکەین بە جێبەجێکردنی ناوەڕۆکی ئەو لێکتێگەیشتنە و دەیخەینە خزمەت خوێندکاران".