بەیاننامەی دامەزراوەی سەرۆک جەلال تاڵەبانی بەبۆنەی کۆڕەوەکەی ساڵی ١٩٩١-وە

ئەمڕۆ ٣٣ ساڵ(٣١ی ئازاری ١٩٩١) تێدەپەڕێت بەسەر کۆڕەوی پڕ لە ئازاری خەڵکی کوردستاندا لە دەستی رژێمی پێشووی عیراق، چەند رۆژێک دوای راپەڕین و ئازادکردنی زۆربەی شارەکانی باشووری کوردستان لە دەستی رژێمی بەعسی رووخاو ، سوپای ئەو کاتی عێراق هێرشێکی نامرۆڤانە لە زەویی و ئاسمانی بەرفراوانی کردە سەر کوردستان و لە ئەنجامدا نزیکەی دوو ملیۆنێک کورد لە ترسی دووبارەبوونەوەی ئەنفال و کیمیاباران و کوشتنی بە کۆمەڵ، ماڵ و حاڵیان بەجێهێشت و بە رێگە سەختەکاندا خۆیان گەیاندە سنوورەکانی ئێران و تورکیا چوونە ئەو وڵاتانە.
  
ئەو رۆژە رەشە بۆ کورد زۆر سەخت و دژوار بوو. بێ جیاوازی منداڵ و پیر زۆرترین ئازاریان چەشت. سەرەڕای کوشتن و بڕین چەندین کورد، بەشێكی دیکەش بەهۆی سەرماوە گیانیان لەدەستدا. هەر ئەم ئازارەبوو سه‌رنجی هه‌موو جیهانی بۆلای خۆی راكێشاو بووه‌ هۆی ده‌ركردنی بڕیاری ٦٨٨ی ئه‌نجوومه‌نی ئاسایشی نێوده‌وڵه‌تی.

لە بەیرکردنی ئەم رۆژە پڕ لە ئازار و مەینەتییە مەحاڵە تەنها تاوانی ئەوەش کە حکومەتی بەعسی رووخاو وەک بیانوو هێنایەوە بۆ شەرعیدان بەم کارە نامرۆڤانەی داوکردنی مافە و ژیانێکی شایستەبوو بۆ گەلەکەمان. کورد چەوساندنەوە و زوڵم و سته‌م و ژیانی ژێرده‌ستی و داگیركاری ره‌تکردەوە‌ و تینو بوو بۆ ئازادی و سه‌ربه‌ستیی، کورد دژ بەهەر هەوڵێک دەوەستێتەوە کە ببێتە هۆی ئازاردان یان کوشتن و بڕین و دەرکردنی لەسەر خاک و ماڵی خۆی هەمیشە قوربانی داوە لە پێناو مافەڕاواکانی.
سەرکەوتن و سەربەرزی بۆ کورد و کوردستان، سەرشۆڕی بۆ داگیرکەران.


 
                              باڵیۆز د. محەمەد سابیر
                    سەرۆکی دامەزراوەی سەرۆک جەلال تاڵەبانی
 
.