پەیامی دامەزراوەی سەرۆک جەلال تاڵەبانی بەبۆنەی ساڵیادی تاوانی ئەنفالەوە

لەیادی ٣٦ ساڵەی تاوانی ئەنفال، بە پەژارە و خەم و ئازارەوە یادی قۆناغەکانی تاوانی ئەنفال دەكەینەوە كە رژێمی بەعس دژی بە گەلی کوردی ئاشتیخواز بە هەشت قۆناغ بەرپایکرد کە بووە هۆی شەهیدبوونی (١٨٠) هەزار هاوڵاتیی سڤیلی (منداڵ، گەنج و پیر)ـــی كورد و خاپورکردنی زیاتر لە پێنج هەزار گوند. لەم بۆنە غەمبارەدا سەری رێز و نەوازش بۆ گیانی پاكی سەرجەم شەهیدان، قوربانییان و کەسوکاری خانەوادەی ئەم تاوانە قێزەونە دژ بە مرۆڤایەتییە دادەنوێنین.

تاوانی ئەنفال؛ ساڕێژنەبوونی برینێکە لەسەر جەستەی هەموو تاکێکی کورد، ئەنفال كۆمەڵكوژی و زیندەبەچاڵ کردن بوو، هەر تاوانێك نەبوو دژ بە كورد، بەڵكو  هەوڵی سڕینەوەی نەتەوەی کورد و قات و قڕکردنی بوو لە هەمان کاتدا تەحدییەک بوو بە بەرچاوی هەموو جیهانەوە.

جێ دڵخۆشییە لە ساڵی ٢٠٠٨  دادگای باڵای تاوانەکانی عیراق کەیسی ئەنفالی وەک تاوانی جەنگ و  دژە مرۆڤایەتی  ناساند، دەبێت کۆمەڵگەی نێودەوڵەتی و لایەنە پیوەندیدارەکان لەسەر ئاستی جیهان ئەم تاوانە بە جینۆساید بناسێنن و هەوڵی ئەوە بدەن ئەم جینۆسایدە بەرانبەر بە کورد و هەر نەتەوەیەکی دیکە دووبارە نەبێتەوە لە هەمان کاتدا دەبێت حکومەتی فیدراڵی عیراق ئاوڕێكی جددی لە كەسوكاری قوربانییانی ئەنفال بدادەتەوە و قەرەبووییان بکاتەوە.

دروود بۆ گیانی پاكی شەهیدانی ئەنفال و خۆڕاگریی کەسوکاریان.

                باڵیۆز د. محەمەد سابیر
  سەرۆکی دامەزراوەی سەرۆک جەلال تاڵەبانی