یوسف زۆزانی: حەوت کورسی خوێندنمان بۆ خوێندکاران دابینکردووە

دامەزراوەی سەرۆک جەلال تاڵەبانی لەماوەی رابردوودا توانیویەتی ژمارەیەک کورسیی خوێندن لە دەرەوەی وڵات بۆ زانکۆکانی هەرێمی کوردستان دابین بکات، جێگری سەرۆکی دامەزراوەکەش دەڵێت: "لەسەر روئیای سەرۆک مام جەلال گرنگی بە زانکۆکان و گەنجان دەدەین و لە ساڵانی ئایندەدا ژمارەیەک کورسیی خوێندنی زیاتر بۆ زانکۆکان دەستەبەر دەکەین".

یوسف زۆزانی، جێگری سەرۆکی دامەزراوەی سەرۆک جەلال تاڵەبانی بە سایتی رەسمی یەکێتیی نیشتمانیی کوردستان PUKMEDIA ی راگەیاند: "لەماوەی رابردوودا دامەزراوەکەمان حەوت کورسیی خوێندنی لە دەرەوەی وڵات بۆ خوێندکاران دابینکردوەو پێشکەشی زانکۆکانی کردووە، کە دوو کورسییان بۆ زانکۆی سلێمانی و دوو کورسی دیکە بۆ زانکۆی پۆلەتەکنیکی سلێمانی و کورسییەکی دیکە بۆ زانکۆی کۆیە بووە، کە ئەم پێنج کورسییە لەلایەن کونسوڵخانەی چینەوە پێشکەش بە دامەزراوەکە کراوە، هەروەها دوو کورسی دیکەش لەلایەن دامەزراوەی (بەحر ئەلعلوم) لە نەجەف، پێشکەش بە دامەزراوەکەمان کراوەو ئێمەش بەخشیومانە بە زانکۆی گەرمیان".

"لەماوەی رابردوودا باڵیۆز د. محەمەد سابیر، سەرۆکی دامەزراوەی سەرۆک جەلال تاڵەبانی سەردانی بەغدای کرد و لەگەڵ بەشێکی زۆری باڵیۆزی وڵاتان کۆبووەوە و یەکێک لە تەوەرەکان کە گفتوگۆی لەبارەوە کراوە، پرسی دابینکردنی کورسیی خوێندن بوو لە وڵاتەکانیان بۆ خوێندکارانی هەرێمی کوردستان لەڕێگەی دامەزراوەی سەرۆک جەلال تاڵەبانی_یەوە، ئەوانیش بەڵێنیاندا کە لە ساڵی ئاییندەدا کورسیی زیاتری خوێندن بۆ دامەزراوەکە دەستەبەر بکەن"، یوسف زۆزانی وای وت.

جێگری سەرۆکی دامەزراوەی سەرۆک جەلال تاڵەبانی دەشڵێت: "گرنگیدانمان بە زانکۆکانی هەرێمی کوردستان و گەنجانمان لە چوارچێوەی روئیای سەرۆک مام جەلال دێت، کە هەمیشە گرنگییەکی تایبەتی بە زانکۆکان داوە و وەک دامەزراوەیەکی مەعریفی گرنگ لە زانکۆکانی روانیوە".

دامەزراوەی سەرۆک جەلال تاڵەبانی دامەزراوەیەکی نا حکومی سەربەخۆی قازانج نەویست و بێلایەنە، هەروەها کولتووری، مرۆڤایەتی و نیشتمانییە، کاردەکات بۆ ناساندن و پاراستن و ئەرشیفکردنی ژیان و خەباتی سەرۆک جەلال تاڵەبانی، کە رۆژی 28-9-2022 دامەزراندنی دامەزراوەکە لە کۆنگرەیەکی رۆژنامەوانیدا راگەیەندرا.