سەرۆکی دامەزراوەی سەرۆک جەلال تاڵەبانی لە شاری بەغدا سەردانی سەرۆکی هاوپەیمانیی دەوڵەتی یاسا دەکات

باڵێۆز د. محەمەد سابیر، سەرۆکی دامەزراوەی سەرۆک جەلال تاڵەبانی رۆژی دووشەممە رێکەوتی ٧ی ٨ی ٢٠٢٣، لە شاری بەغدا سەردانی نوری مالکی، سەرۆکی هاوپەیمانیی دەوڵەتی یاسای کرد.

لە دیدارێکی دۆستانەدا باڵیۆز د. محەمەد سابیر باسی لە گرنگی و رۆڵی دامەزراوەی سەرۆک جەلال تاڵەبانی کرد وەک دامەزراوەیەکی رۆشنبیری، زانستی و کولتووری لە هەردوو ئاستی کوردستان و عێراقدا، تەواوکەری بەرنامە و رێبازی سەرۆک جەلال تاڵەبانییە؛ کە لە شەست ساڵی خەباتی خۆیدا کاری بۆ درووستبوونی عێراقێکی دیموکراس و مەدەنی کردووە، ویستی زۆری بۆ پێکەوەژیانی نەتەوە و ئایینزاو شارستانیەتە جیاوازەکان هەبووە.

هەر لە دیدارەکەدا سەرۆکی دامەزراوەی سەرۆک جەلال تاڵەبانی؛ داوای هاوکاری و هەماهەنگی کاری هاوبەشکرد لە ئاستی گۆڕەپانی کۆمەڵایەتیی عێراقدا؛ باسی لەوەشکرد ئامانجی دامەزراوەی سەرۆک جەلال تاڵەبانی درووستکردنی رایەڵەی پەیوەندیی زیاترە لە ئاستی تەواوی لایەن و پێکهاتەکانی عێراقدا.

پاشان لای خۆیەوە سەرۆکی هاوپەیمانیی دەوڵەتی یاسا بەرێز نوری مالکی؛ سوپاسی باڵیۆز د. محەمەد سابیر، سەرۆکی دامەزراوەی سەرۆک جەلال تاڵەبانی و وەفدی دامەزراوەی کرد؛ کە هاتوونەتە شاری بەغداو بەسەریان کردووتەوە؛ بەڵێنی هاوکاری هەماهەنگیدا بۆ زیاتر سەرکەوتنی کارەکانی دامەزراوەی سەرۆک جەلال تاڵەبانی لە ئاستی عێراقدا.