لەتیف هەڵمەت: سەرۆك مام جەلال دۆستی ئەدیب و نووسەران بوو

وەفدێكی مەكتەبی سكرتارییەتی سەرۆك مام جەلال رۆژی 5/9 سەردانی لەتیف هەڵمەت، شاعیری گەورە و ئەدیبی ناسراویان کرد و لەنزیكەوە لە دۆخی تەندروستییان پرسی و سڵاوی بافڵ تاڵەبانی سەرۆكی یەكێتیی و قوباد تاڵەبانی سەرپەرشتیاری مەکتەبی سكرتارییەتیی سەرۆك مام جەلال-یان پێگەیاند.

لای خۆیەوە لەتیف هەڵمەت خۆشحاڵی بەسەردانەكە دەربڕی و باسی لە دۆستایەتی رەوانشاد سەرۆك مام جەلال لەگەڵ نووسەر و ئەدیب و رۆژنامەنووسان بەتایبەتی و چین و توێژەكان بەگشتی كرد و رایگەیاند:

"سەرۆك مام جەلال دۆستایەتیی بەتینی لەگەڵ ئەدیباندا هەبوو، پاڵپشتییەكی گرنگی ئازادی و ئازادیی رەخنە بوو، لەگەڵیشیدا داكۆكیكار و بەدیهێنەری نان و ئازادی بوو".

هەروەها تێڕوانینی سەرۆك مام جەلالی وەبیرهێنایەوە و وتی:

"سەرۆك مام جەلال، شاعیر و ئەدیب و نووسەر و روناكبیرانی بە موڵكی نەتەوە و نیشتمان دەزانی و پشتیوانی بێمەرجیان بوو، بۆیە هەمیشە لەگەڵ فراوانكردنی فەزای ئازادی و رەخنە و داهێنانەكانیان دابووە".

ئەم سەردانەی سكرتاریەتیی سەرۆك مام جەلال-یشی بەرزنرخاند وەك هەواڵپرسی و ئاوڕدانەوە و پێزانین بەرانبەر بەو كۆشش و خزمەتەی پێشكەشی میللەتەكەیان كردووە.

لەتیف ھەڵمەت نووسەر و شاعیر و رۆژنامەنووسی بەناوبانگی کوردە، لە ساڵی ١٩٤٧ لە کەرکووک لەدایکبووە، لە ساڵی ١٩٧٩ دەستیکردووە بە نووسین لە بواری منداڵاندا، زیاتر لە بیست دیوانی هۆنراوە و ١٧ بڵاوکراوەی بۆ منداڵان هەیە.

ھەروەھا خەڵاتی (ئاپیک)ی لەسەر دیوانی منداڵان وەرگرتووە، چەند جارێکیش خەڵاتی وەزارەتی رۆشنبیری وەرگرتووە.

خاوەنی دەیان دیوان و بەرهەمی شیعری و ئەدەبی و توێژینەوە و بەرهەمی منداڵانە.