لێبووردنێک تەنها سەرۆک جەلال تاڵەبانی ناگرێتەوە

ئەو رۆژەی سەدام حسێن لێبووردنی گشتی بۆ هەموو کوردێک دەرکرد، جگە لە سەرۆک مام جەلال،لە رۆژی هەشتی ئەیلوولی ساڵی 1988، حزبی بەعسی عێراقی کۆبووەوە و بڕیاری لێبووردنی گشتی بۆ هەموو کوردەکانی عێراق دەرکرد، جگە لە یەک کەس، کە بێبەش بوو لەو بڕیارە، ئەویش سەرۆک مام جەلال بوو.

بەپێی ئەو بڕیارەی بە ناونیشانی (لێبووردنی گشتی و فراوان بۆ هەموو کوردانی عێراق) لە ئەیلوولی ساڵی 1988 دەرکراوە، تێیدا هاتووە؛ " بە پشتبەستن بە بڕگەی (1) لە ماددەی 42، لە دەستووری عێراق، ئەنجوومەنی شۆڕش (ثورة) لە دانیشتنی رۆژی 8ی ئەیلوولی 1988 بڕیاریدا، هەموو ئەو کوردە عێراقییانەی بەیاننامەی ئەنجومەنی سەرکردایەتیی شۆڕش لە رێکەوتی 6ی ئەیلوولی 1988 دەیانگرێتەوە، بەر لێبووردنی گشتی و فراوان دەکەون لە هەر کارێک، کە یاسا سزای بۆ داناوە، کە پێش بڕیارەکەی ئەنجومەنی سەرکردایەتیی شۆڕش لە 6ی ئەیلوولی 1988 ئەنجامدرابێت، گەر لە دەرەوە یاخود لە ناوەوەی عێراق بووبن، بەڵام بکوژی بەئەنقەست و ئەوانەی دزییان کردووە، بەدەردەبن لەم بڕیارە".

لە بەشێکی دیکە بڕیارەکەدا هاتووە؛ "هەموو کوردێک کە مەحکوم بێت، یاخود راگیرابێت، بەر لێبووردنی گشتی دەکەوێت و دۆسیەکەی دادەخرێت و ئازاد دەکرێت، ئەمەش گەر مەحکوم نەبن یان رانەگیرابن لەسەر دۆسیەی دیکە، کە ئەنجومەنی سەرکردایەتیی شۆڕش لە 6ی ئەیلوولی 1988 باسینەکردبێت، هەروەها ئەوانەش، کە تاوانی کوشتنی بەئەنقەست، یان دزیکردن سزادراون لەو بڕیارە بێبەشدەکرێن".

لە بڕگەی سێیەمی بڕیارەکەدا هاتووە؛ ئەم لێبووردنە گشتییە، تەنها (خیانەتکار) جەلال تاڵەبانی ناگرێتەوە.