سه‌رۆكی دامه‌زراوه‌ی سه‌رۆك جه‌لال تاڵه‌بانی رایگه‌یاند كه‌ بۆ ئه‌مساڵ، ساڵیادی كۆچی دوایی سه‌رۆك مام جه‌لال (شكۆی نیشتمان)، جیاواز له‌ ساڵانی رابردوو ده‌كرێته‌وه‌ و به‌ دانانی تاجه‌ گوڵینه‌ له‌ سه‌ر مه‌زاری مام له‌ سلێمانی ده‌ستپێبكات و له‌ نه‌جه‌ف كۆتایی دێت.

باڵیۆز، د. محه‌مه‌د سابیر، سه‌رۆكی دامه‌زراوه‌ی سه‌رۆك جه‌لال تاڵه‌بانی رایگەیاند: "ئاماده‌كارییه‌كانمان بۆ ساڵیادی كۆچی دوایی سه‌رۆك مام جه‌لال به‌كۆتا گه‌شتووه‌ و یاده‌كه‌ له‌ سلێمانی و به‌غدا و نه‌جه‌ف ده‌بێت".

باڵیۆز د. محه‌مه‌د سابیر راشیگەیاند:

"ئه‌مه‌ جگه‌ له‌وه‌ی له‌ رۆژی 10ـی ئۆكتۆبه‌ر، كورته‌ فیلمێك له‌باره‌ی ژیانی سه‌رۆك مام جه‌لال له‌ سلێمانی نمایش ده‌كرێت".

وتی‌: "رۆژی 3ـی ئۆكتۆبه‌ر كه‌ هاوكاته‌ له‌گه‌ڵ رۆژی كۆچی دوایی سه‌رۆك مام جه‌لال، سه‌ره‌تای مه‌راسیمه‌كه‌ به‌ دانانی تاجه‌گوڵینه‌ له‌سه‌ر مه‌زاری مام له‌ ده‌باشان ده‌ستپێده‌كات كه‌ له‌لایه‌ن سكرتارییه‌تی سه‌رۆك مام جه‌لاله‌وه‌ مه‌راسیمه‌كه‌ به‌ڕێوه‌ده‌چێت".

وتیشی

"هه‌مان رۆژ كاتژمێر 4ـی پاشنیوه‌ڕۆ، مه‌راسیمێكی شایسته‌ له‌ به‌غدا له‌ژێر چاودێری سه‌رۆك كۆماری عیراق كه‌ سه‌ركرده‌ عیراقییه‌كان به‌شدار ده‌بن و وتاریان ده‌بێت به‌ڕێوه‌ده‌چێت".

سه‌رۆكی دامه‌زراوه‌ی سه‌رۆك جه‌لال تاڵه‌بانی ئاشكرایكرد كه‌ "هه‌ر له‌ چوارچێوه‌ی ساڵیادی كۆچی دوایی سه‌رۆك مام جه‌لال دا، دامه‌زراوه‌ی سه‌رۆك جه‌لال تاڵه‌بانی و دامه‌زراوه‌ی به‌حر لعلوم، سه‌عات 11ـی پێشنیوه‌ڕۆی رۆژی 4ـی ئۆكتۆبه‌ر له‌ نه‌جه‌ف دیدارێك كه‌ چه‌ند پانێڵیك له‌خۆده‌گرێت سازده‌كه‌ن، تێیدا چه‌ند توێژینه‌وه‌یه‌ك له‌باره‌ی سه‌رۆك مام جه‌لال ده‌خرێنه‌ڕوو".

سه‌رۆك مام جه‌لال، یه‌كه‌م سه‌رۆك كۆماری كوردی‌ عیراق و سكرتێری گشتیی یه‌كێتیی نیشتمایی كوردستان بوو، رۆژی 17-12-2012 به‌هۆی تێكچوونی باری ته‌ندروستییه‌وه‌ له‌ به‌غداوه‌ ره‌وانه‌ی ئه‌ڵمانیا كرا به‌مه‌به‌ستی وه‌رگرتنی چاره‌سه‌ری پزیشیكی و به‌داخه‌وه‌ رۆژی 3-10-2017، دڵه‌ گه‌وره‌كه‌ی له‌لێدان كه‌وت و كۆچیی دوایی كرد.