سەرۆکی دامەزراوەی سەرۆک جەلال تاڵەبانی بەشداری لە کردنەوەی یەکەمین سەنتەری لێکۆڵینەوەی چین لە هەرێمی کوردستان دەکات

رۆژی چوارشەممە رێکەوتی ٢٩ی تشرینی دووەمی ٢٠٢٣ باڵیۆز د. محەمەد سابیر، سەرۆکی دامەزراوەی سەرۆک جەلال تاڵەبانی و شاندێکی یاوەری لە سەرۆکایەتیی زانکۆی سلێمانی، بە ئامادەبوونی بەڕێزان سەرۆکی زانکۆی سلێمانی و پارێزگاری سلێمانی و کونسوڵی گشتیی چین لە هەرێمی کوردستان، بەشداریکرد لە کردنەوەی یەکەمین سەنتەری لێکۆڵینەوەی چین لە هەرێمی کوردستانی عیراق لە زانکۆی سلێمانی.

سەرۆکی دامەزراوەی سەرۆک جەلال تاڵەبانی لە وتەیەکیدا سوپاسی وڵاتی چین و زانکۆی سلێمانی کرد و گرنگی کردنەوەی ئەم سەنتەرەی بۆ میوانان روونکردەوە بە دەستپێشخەرییەکی باشی وەسفکرد.

لەبەشێکی دیکەی قسەکانیدا باڵیۆز د. محەمەد سابیر پشتیوانی دامەزراوەی سەرۆک جەلال تاڵەبانی بۆ زانکۆی سلێمانی و یەکەمین سەنتەری لێکۆڵینەوەی چین لە هەرێمی کوردستانی عیراق لە زانکۆی سلێمانی دەربڕی.

کردنەوەی ئەم سەنتەرە دەرگایەکی باش دەبێت بۆ گەشەپێدانی پەیوەندیی نێوان هەرێمی کوردستان و وڵاتی چین، لەڕووی زانستی، ئەکادیمی، ئابووری، دۆزینەوەی هەلی کار و پێگەیاندنی کادر و رەخساندنی دەرفەتی زیاتر بۆ بەدەستهێنانی کورسیی خوێندن بۆ خوێندکارانی خوێندنی باڵا.