باڵیۆز د. محەمەد سابیر و نزار ئامیدی جەخت لە گرنگی پاراستنی ئەو میراتە گەورەیە دەکنەوە کە سەرۆک جەلال تاڵەبانی جێی هێشتووە

ڕۆژی دووشەممە، 5/20/2024، باڵیۆز د. محەمەد سابیر، سەرۆکی دامەزراوەی سەرۆک جەلال تاڵەبانی و شاندی یاوەری سەردانی نووسینگەی مەکتەبی سیاسیی یەکێتیی نیشتمانیی کوردستان-بەغدایان کرد، لەلایەن بەڕێز نزار ئامێدی، بەرپرسی نووسینگەی مەکتەبی سیاسیی یەکێتی (وەزیری ژینگەی عیراق) پێشوازی کران، لە دیدارەکەدا د. عزەت سابیر، جێگری وەزیری نەوتی عیراق بۆ کاروباری غاز ئامادەبوو.  

باڵیۆز د.محەمەد سابیر پیرۆزبایی لە بەڕێز نزار ئامیدی کرد بۆ وەرگرتنی ئەرکی بەرپرسیارێتی و بەرپرسی نووسینگەی مەکتەبی سیاسیی یەکێتیی نیشتمانیی کوردستان لە بەغدا، جەختیان لە گرنگی پەیوەندی سەرجەم لایەنەکان لەگەڵ یەکێتی کرد، تەئکیدیان لەسەر گرنگی پاراستنی ئەو میراتە گەورەیە کردەوە کە سەرۆک جەلال تاڵەبانی بەجێی هێشتووە کە هەمووان شانازی پێوە دەکەن و دەیپارێزن، پێویستە بە هەموو عیراق و جیهانی بناسێنن.

لای خۆیەوە بەڕێز نزار ئامیدی خۆشحاڵی خۆی بە هاتنی شاندی دامەزراوە دەربڕی و پلانی داهاتووی خۆی بۆ سەرخستن یەکێتی و پەیوەندییەکی درووست لەگەڵ سەرجەم لایەنەکان ئاشکرا کرد، ئاماژەی بە  پێشکەشکردنی ئاسانکاری بۆ ئەو پرۆژەیەی یەکێتی و رووبەڕووبوونەوەی ئەو تەحەدییانەی روو لە یەکێتی و کادرەکانی دەکەن کرد.

  هەروەها هەردوولا رێککەوتن لەسەر دابینکردنی نووسینگەیەک بۆ دامەزراوەی سەرۆک جەلال تاڵەبانی لە مەکتەبی سیاسیی یەکێتیی نیشتمانیی کوردستان لە بەغدا بۆ هاوئاهەنگی و بەدواداچوونی ئیش و کارەکانی دامەزراوە لەگەڵ لایەنەکانی دیکە و ناساندنی دامەزراوەی سەرۆک جەلال تاڵەبانی و کارکردن لەگەڵ دامەزراوە و ریکخراوە هاوشێوەکانی.