سەرۆک مام جەلال:

"دەبێت هەوڵبدەین بە کردەوە وا لە تورکمان و عەرەب بکەین ژیانیان لەگەڵ کورد خۆشترە، ئاسودەترە، بەکەڵکترە بۆ ئەوان پڕ لە ئازادی و دیموکراسی و خێر و بێرترە".

بەبۆنەی هەڵبژاردنی پارێزگار، سەرۆکی ئەنجومەن و سەرکەوتنی پێکهێنانی حکومەتی خۆجێیەتی کەرکوک، لە دوای حەوت ساڵ وەرگرتنەوەی پارێزگاری کەرکوک بۆ پشکی کورد، لەلایەن یەکێتیی نیشتمانیی کوردستان و دانانی رێبوار تەها وەک پارێزگار بۆ شارەکە، پیرۆزبایی خۆمان ئاراستەی یەکێتی و پارێزگاری نوێ دەکەین و هیوای سەرکەوتنیان بۆ دەخوازین و پشتیوانییان دەکەین.

دەخوازین پارێزگاری نوێ بەرۆحێکی برایەتی بێجیاکاری و بێجیاوازی لەنێوان نەتەوەجیاوازەکان و پارتەسیاسییەکان کاری جددی خۆی بکات لەپێناو بەهێزکردن، پاراستن و پتەوکردنی پێکەوەژیان لە نێوان سەرجەم هاوڵاتییانی شاری کەرکوک، و بکرێتە نمونەی جوانی لەسەر ئاستی سەرجەم شارەکانی عیراق و ژیرخانی ئابووری شارەکە ببوژێندرێتەوە و ئاوەدانی و ژیانکردن بگەڕێندرێتەوە.

ئەوەش لای هەمووان روونە کە سەرۆک مام جەلال چۆن و بەچی پلانێک خزمەتی کەرکوک و کەرکوکییەکانی کرد هەمیشە خەمی قووڵی بۆ چەسپاندنی ئاشتی و کاری بەیکەوەی بوو لەو شارەدا، لەم روانگەیەوە بافڵ جەلال تاڵەبانی، سەرۆکی یەکێتی وتی "یەکێتی لە کەرکوک وەکو سەرۆک مام جەلال سیاسەت دەکات، پێش ئەوەی بۆ کوردەکان ئیش بکەین بۆ هەموو خوشک و براکانی دیکەمان ئیش دەکەین".

جارێکی دیکە پیرۆزبایی لە کەرکوکییەکان و لە پارێزگاری نوێی کەرکوک دەکەین و هیوادارین قۆناغی خزمەتکردنی شارەکە دەستپێبکات

باڵیۆز د. محەمەد سابیر
سەرۆکی دامەزراوەی سەرۆک جەلال تاڵەبانی