باڵیۆز د. محەمەد سابیر: پێویستە رۆژی یادی ژیانئاوایی سەرۆک جەلال تاڵەبانی بکرێتە رۆژێکی نیشتمانی لە عیراقدا

  سەرۆکی دامەزراوەی سەرۆکی جەلال تاڵەبانی رایگەیاند یادی حەوتەمین ساڵڕۆژی ژیانئاوایی سەرۆک جەلال تاڵەبانی لە شاری کەرکوک دەبێت و دەڵێت پێویستە ئەو رۆژە بکرێت بە رۆژێکی نیشتمانی و باسی لەوەش کرد مام جەلال ئەندازیاری ماددەی ١٤٠ بوو.

باڵیۆز د. محەمەد سابیر، سەرۆکی دامەزراوەی سەرۆکی جەلال تاڵەبانی لە کۆنگرەیەکی رۆژنامەوانیدا کە رۆژی دووشەممە ٣٠ی ئەیلولی ٢٠٢٤ بۆی سازکرابوو وتی:

"کەرکوک بۆ گەلی کورد و عیراق گرنگییەکی مێژوویی هەیە، هەمیشە مام جەلال دەیوت کەرکوک قودسی کوردستانە".

سەرۆکی دامەزراوەی سەرۆکی جەلال تاڵەبانی وتیشی: "مام جەلال ئەندازیاری ماددەی ١٤٠ بوو هەمیشە لەگەڵ ئەوە بووە مافی سەرجەم نەتەوەکان و پێکهاتەکان پارێزراوبێت بێجیاوازی خزمەت بە کەرکوک و کەرکوکییەکان بکرێت".

لەو کۆنگرە رۆژنامەوانییەدا باڵیۆز د. محەمەد سابیر باسی لەوە کرد: "یادی حەوتەمین ساڵڕۆژی ژیانئاوایی سەرۆک جەلال تاڵەبانی لە شاری کەرکوک دەبێت کە رۆژی پێنجشەممە ٣ی ئۆکتوبەری ٢٠٢٤ کاتژمێری ٥ی ئێوارە بە ئامادەبوونی کۆمەڵێک کەسایەتیی حکومی و حزبی لەسەر ئاستی جیهان، عیراق و هەرێمی کوردستان دەبێت و مەراسیمێکی شایستەی بۆ ئامادەکراوە".

سەرۆکی دامەزراوەی سەرۆکی جەلال تاڵەبانی باسی لەوەش کرد:

" رۆژی یادی ژیانئاوایی سەرۆک جەلال تاڵەبانی پێویستە بکرێتە رۆژێکی نیشتمانی لە عیراقدا، چونکە مام جەلال هیچی لەو سەرکردانەی دیکەی جیهان کەمتر نییە بگرە زیاترە کە رۆژی کۆچی دواییان کراوە بە رۆژی نیشتمانی.