سەرۆك وەزیرانی عیراق: سەرۆك مام جەلال رەمزێكی نیشتمانییە

محەمەد شیاع سودانی تاجەگوڵینەی وەفا لەسەر مەزاری سەرۆك مام جەلال دادەنێت

ئێوارەی ئەمڕۆ چوارشەمە رێکەوتی١٣ی١١ی٢٠٢٤، بەڕێز محەمەد شیاع سودانی سەرۆك وەزیرانی عیراق گەیشتە سلێمانی و بە یاوەری بەڕێز قوباد تاڵەبانی، جێگری سەرۆك وەزیرانی حكومەتی هەرێمی کوردستان و باڵیۆز د. محەمەد سابیر، سەرۆکی دامەزراوەی سەرۆک جەلال تاڵەبانی و  لە یەكەم وێستگەی سەردانەكەشیدا سەردانی مەزاری سەرۆك مام جەلال-ی كردو تاجەگوڵینەی رێزو وەفای لەسەر مەزارەكەی دانا.

محەمەد شیاع سودانی لە دەفتەری یاداشتەكانی مەزارەكەدا نووسی: "هیوای گەورەمان هەیە كوڕو هەڤاڵەكانی سەرۆك مام جەلال لەسەر رێبازەكەی بەردەوامبن، سەرۆك مام جەلال رەمزێكی نیشتمانی بوو بۆ عیراق و دژی دیكتاتۆرییەت تێیكۆشاوەو رۆڵی لەبونیادنانی عیراقی نوێ و پڕۆسەی سیاسیدا هەبووە".
 
دەشنووسێت: "دەبێت وانەو پەند لەڕێچكەی خەباتی سەرۆك مام جەلال و پەرۆشی گەورەی بۆ یەكڕیزی نیشتمانی و پێشخستنی بەرژەوەندی گشتی و پاراستنی مافی سەرجەم پێكهاتەكان فێرببین.

لەكۆتایی یاداشتەكەیدا سەرۆكوەزیرانی عیراق ئاماژەی بەوەداوە: رۆحی مام جەلال شادبێت و هیوای گەورەمان بەكوڕو هەڤاڵەكانی هەیە كەلەسەر رێبازەكەی بەردەوامبن.