سكرتێری پێشووی رێكخراوی سۆسیالیست ئینتەرناشناڵ سەردانی مەزاری سەرۆك مام جەلال دەکات

رۆژی دووشەممە ۹ی دیسەمبەری ۲۰۲٤ بەڕێز لویس ئایالا، سكرتێری پێشووی رێكخراوی سۆسیالیست ئینتەرناشناڵ و هاوڕێ سەرۆک مام جەلال سەردانی مەزاری سەرۆك مام جەلالی کرد و لەلایەن باڵیۆز د. محەمەد سابیر، سەرۆکی دامەزراوەی سەرۆک  جەلال تاڵەبانی پێشوازی لێکرا.

بەڕێز لویس ئایلا تاجەگوڵینەی خۆشەویستی، رێز و وەفای لەسەر مەزاری سەرۆک مام جەلال دانا لە تیانووسی یادەوەرییەکاندا پاش   نووسینی چەند بیرەوەرییەکی خۆی و سەرۆک مام جەلالی نووسی و تیشکی خستەسەر  رۆڵی و هەنگاوە ئەرێنییەکانی سەرۆک مام جەلال لەبارەی پێکەوەژیان لە عیراق و  هەرێمی کوردستان باسی لەوەشکرد مام جەلال هاوڕێ و هاوخەباتی رێگەی تێکۆشا بووە بۆ هێنانەکایەی ئازادی بیروڕا و ئاشتی بۆ گەلانی جیهان.

سكرتێری پێشووی رێكخراوی سۆسیالیست ئینتەرناشناڵ لەبەردەم میدیاکاندا وتی: "ئێمە بە شانازییەوە ئەو خزمەتانە دێنینەوە یادمان و رێزدەگرین لە مێژوو، قوربانییەکانی کە لەپێناو مرۆڤایەتیدا داویەتێ".

وتیشی: "لەماوەی رابردوودا مام جەلال رۆڵی گەورەی هەبوو لە گۆڕانكارییەكاندا، مام جەلال توانای  تێپەڕاندنی زۆربەی قەیرانەكانی هەبوو، لەڕێی قورسایی و پێگە سیاسی و كۆمەڵایەتییەكەیەوە".

پاشان بەڕێز لویس ئایلا سەردانی مۆزەخانەی ئەمنەسورەکەی کرد و لە کۆتایی سەردانەکەشیدا ئۆفیسی سەرەکی دامەزراوەی سەرۆک جەلال تاڵەبانی لە شاری سلێمانی بەسەرکردەوە و خۆشحاڵی خۆی بە بوونی دامەزراوەکە دەربڕی و کارەکانی رابردووی دامەزراوەکەشی بەدەستکەوتێکی باش وەسفکرد.