سەرۆکی دامەزراوەی سەرۆک جەلال تاڵەبانی لەسەر مەزاری مام پێشوازی لە سەرۆکی رەوتی حیکمە دەکات

سەرۆکی دامەزراوەی سەرۆک جەلال تاڵەبانی لەسەر مەزاری مام پێشوازی لە سەرۆکی رەوتی حیکمە دەکات

ئێوارەی ڕۆژی سێشەممە ۷ی ۱ی ۲۰۲٥ سەماحەتی عەممار حەکیم، سەرۆکی رەوتی حیکمە لە شاری سلیمانی سەردانی مەزاری مام جەلال کرد و لەلایەن باڵیۆز د. محەمەد سابیر، سەرۆکی دامەزراوەی سەرۆک جەلال تاڵەبانی پێشوازییەکی گەرمی لێکرا.

بەڕێز عەممار حەکیم لە دەسپێکی سەردانەکەیدا لە شاری سلێمانی، چووە سەر مەزاری مام و تاجەگوڵینەی رێزوەفای لە سەر مەزارەکە داناو لە تیانووسی یاداشتەکاندا بیرەوەرییەکانی خۆی لەگەڵ مام جەلال نووسییەوە و تیشکی خستە سەر رۆڵی مێژوویی و پێگەی تایبەتەکەی سەرۆک مام جەلال لە ناوچەکە و عیراق دەشڵێت:" مام جەلال هێمایەکى یەکگرتوویى نیشتمانیى گەورەیە و شانازى پێوەدەکەین".

سەماحەتی عەممار حەکیم هاوڕێی دێرینی سەرۆک مام جەلال دەنووسێت: "هەرکاتێک سەردانى پارێزگاى سلێمانى دەکەین، راهاتووین سەردانى مام جەلال بکەین بە زیندوویى یاخود مەزارەکەى".

سەرۆکی رەوتی حیکەمە لە کۆتایی قسەکانیدا لەبەردەم دەزگاکانی رایگەیاندا وتی سوپاسی ئەو پێشوازییە گەرمەی دامەزراوەی سەرۆک جەلال تاڵەبانی دەکەین و شانازی بە بوونی ئەم دامەزراوەیەوە دەکەین.

بەڕێزان نزار ئامێدی، ئەندامی مەکتەبی سیاسیی یەکێتیی نیشتمانیی کوردستان و ئەندامانی مەکتەبی سکرتارییەت سەرۆک مام جەلال ئامادەی پێشوازیی سەرۆکی رەوتی حیکمە بوون لەسەر مەزاری مام.

دەقی ئەو نووسینەکەی بەڕێز عەممار حەکیم لە دەفتەرى یاداشتەکانى مەزارى مام جەلال نووسی "هەرکاتێک سەردانى پارێزگاى سلێمانى دەکەین، راهاتووین سەردانى مام جەلال بکەین بە زیندوویى یاخود مەزارەکەى، ئەوەش وەکو رێزلێنانى بەرز و گەورەمان بۆ ئەو سەرکردە نیشتمانییە کوردییە عێراقییە، وەکو بیرخستنەوەیەک بۆ هەڵوێستە زیندووەکانى لە بەرەنگاربوونەوەى دیکتاتۆریەت و بنیادنانى سیستمى دیموکراتیى نوێ، هێمایەکى یەکگرتوویى نیشتمانیى گەورەیە و شانازى پێوەدەکەین.. ئەوەش دەرفەتێکە بۆ بیرخستنەوەى پەیوەندییە مێژووییەکانمان لەگەڵ بەڕێزیاندا و برایانى یەکێتیى نیشتمانیى کوردستان".