پیرۆزبایی دامەزراوەی سەرۆک جەلال تاڵەبانی بەبۆنەی ۳٤هەمین ساڵڕۆژی هەڵگیرسانی راپەڕینە مەزنەکەی کوردستانەوە

کەسوکاری سەربەرزی شەهیدان، پێشمەرگە قارەمانەکان...
هاوڵاتییانی سەربەرزی شاری رانیە...
داگیرسێنەرانی یەکەم مەشخەڵی رزگاریکەری تەواوی کوردستان...

لە (٣٤)هەمین ساڵیادی راپەڕینی خەڵکی سەربەرزی کوردستاندا (راپەڕینی ئاداری 1991)، پیرۆزبایی لە کەسوکاری سەربەرزی شەهیدان، پێشمەرگە قارەمانەکان، گەلی کوردستان و سەرجەم هاوڵاتییانی خۆڕاگریی کوردستان دەکەین، هەر بەو بۆنەیەوە چەپكە گوڵی رێز و وەفا پێشكەش بە خەڵكی کوردستان دەکەین.

ئەرکی هەمووانە ئەمڕۆ کە یادی ڕاپەڕین دەکەینەوە کە بە رابەرایەتی و تێکۆشانی سەرۆک مام جەلال و یەکێتیی نیشتمانیی کوردستان و خوێنی شەهیدان هاتووەتە دی، پێویستە بە هەمان رۆحیەتی سەرۆک مام جەلال و رۆژانی راپەڕین دەست لەناو دەست بەتەبایی و یەکڕیزی لەپێناو یەکگرتوویی و کورد و ئامانجە وەدینەهاتووەکانمان خەبات بکەین و داکۆکی لە مافە دەستوورییەکانی گەلی کوردستان بکەین، هەروەها هەنگاوی زیاتر بنێین لەپێناو دەستەبەركردنی خۆشگوزەرانی و باشتركردنی ژیانی چین و توێژەكانی خەڵکی كوردستان.


ئەوەی ئەمڕۆ خاوەنین و بەدەستهاتووە بەری رەنجی خوێن و قوربانیدانی شەهیدان و خەڵکی راپەڕیوی راپەڕینە، پاراستن و هێشتنەوەی سەروەرییەکانی راپەڕین و پیرۆززانینی ئەرکی لە پێشینەمان بێت، هیوادارین ئەم یادە هەوێنی زیاتری قۆڵكردنەوەی گیانی برایەتی، تەبایی و یەكڕیزی نێوماڵی گەلەكەمان بێت.

ئاواتەخوازین لەم رۆژە پیرۆزەدا هێزو لایەنە سیاسییەکانی هەرێمی کوردستان ململانێکانیان وەلابنێن و خەبات بکەن بۆ خزمەتکردنی کۆمەڵانی خەڵکی کوردستان و چارەسەرکردنی ریشەیی کێشەکان.

شکۆدار بێت ساڵڕۆژی راپەڕینە مەزنەکەی گەلی کوردستان

سەری ڕێز و نەوازش بۆ شەهیدانی راپەڕین و تەواوی شەهیدانی رێگەی رزگاریی گەلی کوردستان دادەنوێنین.

باڵیۆز د. محەمەد سابیر
سەرۆکی دامەزراوەی سەرۆک جەلال تاڵەبانی 
 ئاداری ٢٠٢٥