پەیامی دامەزراوەی سەرۆک جەلال تاڵەبانی بەبۆنەی (٣٧)هەمین ساڵیادی کارەساتی کیمیابارانکردنی شاری هەڵەبجە _وە

کۆمەڵکوژی بەرانبەر شاری هەڵەبجە لە ١٦ی ئازاری ١٩٨٨و کیمیابارانکردنی لەلایەن رژێمی پێشووی عیراقی دیکتاتۆرەوە و شەهیدکردنی ٥٠٠٠ هەزار هاوڵاتیی بێتاوانی و بریندارکردنی بەشێکی زۆر کە تائێستا بە دەست ساڕێژنەبوونی برینەکەیانەوە دەناڵێنن بەبێ چارەسەر ماونەتەوە.

بە خەمێكی  زۆر و قووڵەوە یادی ئەو كارەساتە قێزەونە گەورەیە دەكەینەوە كە بەرانبەر گەلەکەمان کرا، كیمیابارانكردنی هەڵەبجە برینێكی قووڵە لەسەر جەستەی هەموو تاکێکی کورد و مەحاڵە لەبیر بكرێت ، دەبێت دووربکەوینەوە لە درووشمی بریقەدار و بە کردار خزمەتی هەڵەبجە بکەین.
 دەشخوازین ئەنجومەنی نوێنەرانی عیراق یاری بەکات نەکات بەفەرمی دان بە پارێزگابوونی شارەکەدا بنێت وەک یەکێک لە سەراتایترین مافدا،  هەڵەبجە سیمبۆلی قوربانیدان و شەهیدی دەستی دیكاتۆریەتی بەعس، پێویستە حکومەتی عیراق كەسوكاری شەهیدان و ئەو قوربانییانەی هێشتا لە ژیاندان قەرەبوو بكاتەوە و چارەسەری تەواویان بۆ بکات، داوا دەكەین حکومەتی عیراق هەنگاوی کردەیی بنێت بۆ بە جینۆسایدناسینی ئەم کۆمەڵکوژییەی شاری هەڵەبجە لەسەر ئاستی جیهان.
کارەساتی هەڵەبجە هەموو چرکەیەک لەیاد و بیرەوەری و هۆشی تاک بەتاکی گەلەکەمان بەزیندوێتی دەمێنێتەوە.

سەربەرزی بۆ رۆحی ٥٠٠٠ شەهیدی هەڵەبجە و سەرجەم شەهیدانی رێگە رزگاریی گەلی كوردستان

باڵیۆز د. محەمەد سابیر
سەرۆکی دامەزراوەی سەرۆک جەلال تاڵەبانی