پارێزگاری هەڵەبجە بە وەکالەت سەردانی دامەزراوەی سەرۆک جەلال تاڵەبانی دەکات

رۆژی پێنجشەممە رێکەوتی ۲۷ی ۳ی ٢٠٢٥ باڵیۆز د. محەمەد سابیر، سەرۆکی دامەزراوەی سەرۆك جەلال تاڵەبانی پێشوازی لە بەڕێز نوخشە ناسێح، پارێزگاری هەڵەبجە بە وەکالەت و بەڕێز سەرخێڵ غەفار، بەڕێوەبەری گشتیی رۆشنبیری و هونەری شاری هەڵەبجە دەکات.

 لە دیدارێکدا باڵیۆز د. محەمەد سابیر، روونیکردەوە کارکردنی دامەزراوەی سەرۆك جەلال تاڵەبانی لە دیدگەی سەرۆک مام جەلالەوە سەرچاوەی گرتووە و دەیانەوێت رۆڵێکی بوونیادنەرانە لە ئاستی کۆمەڵگە بگێڕن بە تایبەت لەبواری ئەرشیفکردن، کۆکردنەوەی بەڵگە، رۆشنبیری، کولتووری، زانستی و گەشەی مرۆیی.

لە بەشێکی دیکەی دیدارەکەدا گفتوگۆکرا لە بارەی ئامادەکاری و خۆسازکردن بۆ کۆنفرانسێک لە بارەی جینۆسایدی شاری هەڵەبجەوە کە لەلایەن دامەزراوەی سەرۆک جەلال تاڵەبانی-یەوە بڕیارە لە مانگی نیسانی داهاتوو ئەنجامبدرێت.

پارێزگاری هەڵەبجە بەوەکالەت پاڵپشتی خۆی و پارێزگای هەڵەبجەی بۆ دامەزراوەی سەرۆک جەلال تاڵەبانی دەربڕی، ئامادەیشی نیشاندا بۆ هەموو جۆرە هاوکارییەک و بەرەوپێشەوەبردنی زیاتری کار، چالاکییەکانی دامەزراوەکە و باسی لەوەشکرد هاوکاردەبن لە کۆکردنەوەی ئەرشیفی سەرۆک مام جەلال.