لە ٣٧هەمین ساڵیادی ئەنفالدا دامەزراوەی سەرۆک جەلال تاڵەبانی پەیامێک بڵاودەکاتەوە

٣٧ ساڵ بەسەر کارەساتی بەدناوی ئەنفال تێدەپەڕێت، بە پەژارە و خەم و ئازارەوە یادی قۆناغەکانی تاوانی ئەنفال دەكەینەوە رۆژێکی پڕ لەغەم و ژانە بۆ گەلەکەمان كە رژێمی بەعسی دیکتاتۆر دژی بە گەلی کوردی بێتاوان بە هەشت قۆناغ ئەنجامیدا بووە هۆی شەهیدبوونی (١٨٠) هەزار هاوڵاتیی سڤیل.

وێڕای پرۆسه‌ی ئه‌نفال، هه‌ڵمه‌ته‌كانی كۆچپێكردنی زۆره‌ملێی، خاپورکردنی گوندەکان و كۆمه‌ڵكوژی و به‌كارهێنانی چه‌كی كیمیایی و قه‌ده‌غه‌كراو له‌ دژی نه‌ته‌وه‌ی كورد له‌لایه‌ن رژێمی له‌ناوچووی به‌عس له‌ دژی نه‌ته‌وه‌ی كورد بەکارهێندران.
تاوانی ئەنفال؛ هەوڵی سڕینەوەی نەتەوەی کورد بوو، تاوانێکی کەم وێنە و ساڕێژنەبوونی برینێکە لەسەر جەستەی هەموو تاکێکی کورد، ئەنفال كۆمەڵكوژی و زیندەبەچاڵ کردن بوو، لە دوای چەند ساڵ بۆیە ئەرک و بەرپرسیاریەتیی ئەخلاقی و دەستووری حکومەتی فیدراڵە، بە شێوەیەکی شایستە قەرەبووی کەسوکاری ئەنفالکراوان و هەموو قوربانییانی دەستی رژێمی بەعس بکاتەوە.
جێ شانازیمانە لە ساڵی ٢٠٠٨ دادگای باڵای تاوانەکانی عیراق کەیسی ئەنفالی وەک تاوانی جەنگ و دژە مرۆڤایەتی ناساند، داواکارین کۆمەڵگەی نێودەوڵەتی و لایەنە پیوەندیدارەکان لەسەر ئاستی جیهان ئەم تاوانە بە جینۆساید بناسێنن.

هەزار سڵاو بۆ گیانی پاكی شەهیدانی ئەنفال و سەربەرزی بۆ کەسوکاریان.
باڵیۆز د. محەمەد سابیر
سەرۆکی دامەزراوەی سەرۆک جەلال تاڵەبانی