ئەحمەد داودئۆغڵو سەردانی مەزاری سەرۆک "مام جەلال" دەکات

رۆژی یەکشەممە رێکەوتی ۱٨ی ٥ی ٢٠٢٥ ئەحمەد داودئۆغڵو سەرۆکی پارتی ئاییندەی توركیا سەردانی مەزاری سەرۆک "مام جەلال"ی كرد و لەلایەن بەڕێز قوباد تاڵەبانی، لێپرسراوی مەکتەبی سکرتارییەتی سەرۆک مام جەلال و باڵیۆز د. محەمەد سابیر، سەرۆکی دامەزراوەی سەرۆک جەلال تاڵەبانی پێشوازی لێکرا.

ئەحمەد داودئۆغڵو دوای دانانی تاجەگوڵینەی رێز و وەفا، لە دەفتەری یادەوەرییەکاندا بەڕێزەوە باسی لە پەیوەندی دێرینی خۆی و سەرۆک مام جەلال کرد و ئاماژەی بۆ ئەوەکرد، ئەمڕۆ هاتم رێزی خۆم نیشانی هاوڕێكەم دا، وێنە جوانەكانی مام جەلال لە بیرماندا ماوە، مام جەلال هاوبەشیی هەمووان بوو، تەنها هی سلێمانی و عیراق نییە، بەڵكو بۆ هەمووانە و ئەمڕۆ هاتم رێزی خۆمی نیشان بدەم، سلێمانی-ش وەكو زێدی من وایە و هاتنم بۆ ئێرە شەرەفێكی گەورەیە.
ئەحمەد داودئۆغڵو وتیشی: ئەركی من بوو بێم و سەردانی مەزارەكەی بكەم، دواینجار وەك وەزیری دەرەوە هاتم زۆر نەخۆش بوو، بەداخەوە نەمانتوانی بیبینین بۆیە تەنها سەردانی هێرۆ خانی هاوسەریمان كرد كە پێمان دەوت پورێ و راشیگەیاند، خانەوادەی سەرۆك مام جەلال خێزانی منن، قوباد تاڵەبانی وەك برام وایە و كاتێك بانگهێشتی كردم بۆ بەشداریكردن لە كۆڕبەندی دێڵفی لە سلێمانی تەنانەت دووجار بیرم نەكردەوە و گوتم بەڵێ.