سەرۆکی دامەزراوەی سەرۆک جەلال تاڵەبانی پێشوازی لە باڵیۆزی سویسرا لە عیراق دەکات

رۆژی سێشەممە ٣ی ٦ی ۲۰۲٥ باڵیۆز د. محەمەد سابیر، سەرۆکی دامەزراوەی سەرۆك جەلال تاڵەبانی پێشوازی لە بەڕێز دانیێل هون، باڵیۆزی سویسرا لە عیراق  و دلێر کامیل قەرەداغی، نوێنەری باڵوێزخانەی سویسرا لە هەرێمی کوردستان کرد

لە دانیشتنێکدا باڵیۆز، د. محەمەد سابیر پاش بەخێرهاتنی بەڕێز دانیێل هون و شاندی یاوەری باسی لە دامەزراوەی سەرۆک جەلال تاڵەبانی کرد، وتی: " دامەزراوەی سەرۆک جەلال تاڵەبانی دامەزراوەیەکی نا حکومی سەربەخۆی قازانج نەویست و بێلایەنە، کولتووری، مرۆڤایەتی و نیشتمانییە، کاردەکات بۆ ناساندن، پاراستن، ئەرشیفکردنی ژیان و خەباتی سەرۆک جەلال تاڵەبانی".
سەرۆکی دامەزراوەی سەرۆک جەلال تاڵەبانی  وتیشی: " دامەزراوەی سەرۆک جەلال تاڵەبانی گرنگی زیاتر دەدات بە پەرەپێدانی بواری رووناکبیری و توێژینەوەی ئەکادیمی؛ لەسەر فیکر، ژیان و سیاسەتی سەرۆک جەلال تاڵەبانی و گەشەپێدانی چۆنایەتى بە نووسینی توێژینەوەی ئەکادیمی لەسەر رێباز و ئەندێشەى سەرۆک جەلال تاڵەبانى و بڵاوکردنەوەی".

لای خۆیەوە بەڕێز دانیێل هون ستایشی هەوڵە جدییەکانی سەرۆکی دامەزراوەکەی کرد، دەستخۆشی لە کار، پلان و پرۆژەکانی رابردووی دامەزراوەکە کرد، جەختی کردەووە لەوەی هەوڵی جدی خۆیان دەدەن بۆ کاری هاوبەش و پێکەوەیی، هەروەها باڵیۆزی سویسرا وتی: " هاوکار و هەماهەنگ دەبین لەو بوارانەی کە دامەزراوەی سەرۆک جەلال تاڵەبانی کاری تێدا دەکات".