لە رۆژی لەدایکبوونی هێرۆخان_دا

هێرۆخان؛ سیاسەتمەدار، رووناکبیر، پێشمەرگە، کامیرامانەکەی شاخ و هەڵگری خەمی شار...
هێرۆخان سیاسییەکی نەرمونیان؛ دامەزراندنی تەلەفزیۆنی خاک و گۆڤاری خاک، کەناڵی کوردسات، پارێزەری مۆزەخانەی ئەمنەسوورەکە و دامەزرێنەری منداڵپارێزی کوردستان، مۆزەخانەی زاموا و خەزێنەیەکی گەورە لە ئەرشیفی شاخ کەمێکن لە کارەجوانەکانی هێرۆخان.

 هێرۆ ئیبراهیم ئەحمەد، قۆناغە سەختەکانی تێدەپەڕاند و رۆڵی‌ سیاسی‌ بۆ پاراستنی‌ ناوخۆی کورد و یەکێتی‌ ناو یەکێتی‌ دەخستە سەرڕێ راست و ئامانجی بوو، بەتایبەتی لەدوای‌ نەخۆشکەوتنی‌ سەرۆک مام جەلال-ەوە تەواو دیار  و بەدەرکەوت و پڕ مانا بوو. 

هێرۆخان لەگەڵ هاوخەباتەکانی بە ئیرادەیەکی‌ پۆڵایینەوە شانی دەدایە بەر دۆخە سەختەکان و واقیعبینانە دەیگەیاندییە کەناری ئارام، پەیڕەوی سیاسەتی‌ چەپکە گوڵەکەی‌ سەرۆک مام جەلال دەکرد، کارکردنی بەو سیاسەتە تۆختر دەکردەووە، سستییەکانی تێدەپەڕاند و هەمووانی لە دەوری خۆی کۆدەکردەووە، هەرگیز نەدەترسا و بەرەو ئاسۆ هەنگاوی دەنا.
هێرۆخان خاتوونێکی هێمن،‌ کەم دوو و باش گوێ لە بەرانبەری دەگرت، بەڵام کە لە گفتوگۆکاندا‌ بەشداریی دەکرد بڕیارە چارەنووسسازەکانی یەکلایی دەکردەووە. 
هێرۆ ئیبراهیم ئەحمەد، هێرۆخان نازناوەکەیەتێ، هاوژین و هاوخەباتی سەرۆک مام جەلال، لە شاخ لەگەڵ پێشمەرگایەتیدا بەردەوام کامێراکەی لەشان بوو رووداوەکانی ئەرشیف دەکرد و دەیخستە سەر خەرمانی کوردایەتی، هێرۆخان سیاسییەک بوو بە شوێن پێ باوکیدا دەڕۆشت، ئەمڕۆ ١٢ی حوزەیران رۆژی لەدایکبوونیەتێ، ئێمە لە دامەزراوەی سەرۆک جەلال تاڵەبانی هیوای بەردەوامی لە خەبات، لەشساغی و تەمەندرێژی بۆ دەخوازین.
رۆژی لە دایکبوونت پیرۆز بێت.

باڵیۆز، د. محەمەد سابیر
سەرۆکی دامەزراوەی سەرۆک جەلال تاڵەبانی