دامەزراوەی سەرۆك جەلال تاڵەبانی و بەڕێوەبەرایەتیی گشتیی رۆشنبیری و هونەری سلێمانی ئەنجامدانی چەند پرۆژەیەک کۆیان دەکاتەوە

رۆژی یەکشەممە رێکەوتی٢٢ی حوزەیرانی ٢٠٢٥ باڵیۆز د. محەمەد سابیر، سەرۆکی دامەزراوەی سەرۆک جەلال تاڵەبانی و بەڕێز یوسف زۆزانی، جێگری سەرۆکی دامەزراوەکە و شاندی یاوەر پێشوازیان لە محەمەد کوردۆ، بەڕێوەبەری گشتیی رۆشنبیری و هونەری سلێمانی بە وەکالەت و شاندی یاوەری کرد.

لە دیدارێکدا باڵیۆز، د. محەمەد سابیر لەبارەی دامەزراوەی سەرۆک جەلال تاڵەبانی-یەوە، وتی: " دامەزراوەی سەرۆک جەلال تاڵەبانی دامەزراوەیەکی نا حکومی سەربەخۆ و بێلایەنە، کاردەکات بۆ ناساندن، پاراستن، ئەرشیفکردنی ژیان و خەباتی سەرۆک جەلال تاڵەبانی، گرنگی زیاتر دەدات بە پەرەپێدانی بواری ژینگەیی، رۆشنبیری و کولتووری و رووناکبیری، ئەم دامەزراوەیە کار دەکات لەسەر فیکر، ژیان و سیاسەتی سەرۆک جەلال تاڵەبانی".

لەو دیدارەدا باس لەوەکرا دامەزراوەکە و رۆشنبیری سلێمانی لە داهاتوودا کاربکەن لەسەر ئەنجامدانی كاری هاوبەش و پتەوكردنی پەیوەندییە كولتووریی، رۆشنبیری و فەرهەنگییەكانی نیوانیان.
لە بەشێکی دیکەی دیدارەکەدا هەردوولا بڕیاریاندا لە ئاییندەدا لێكتێگەیشتنێك واژۆ بکەن کار و پرۆژە هاوبەشەکانیان لە چوارچێوەی ئەو لێکتێگەیشتنەدا ئەنجامبدەن.