هێزەکانی ئەڵمانیا لە هەرێمی کوردستان سەردانی مەزاری سەرۆک مام جەلال دەکەن

 رۆژی چوارشەممە رێکەوتی ٢ی تەمووزی ٢٠٢٥ بەڕێزان عەقید پیتەر کوپەر، فەرماندەی هێزی سەربازیی وڵاتی ئەڵمانیا لە هەرێمی کوردستان و موقەدەم ڤۆڵکەر تۆماس، راوێژکاری کولتووریی فەرماندەی هێزی ناوبراو و شاندی یاوەری سەردانی مەزاری سەرۆک مام جەلال-یان کرد و لەلایەن باڵیۆز د. محەمەد سابیر، سەرۆکی دامەزراوەی سەرۆک جەلال تاڵەبانی و سەرکرتاریەتیی سەرۆک مام جەلال-وە پێشوازیان لێکرا.

فەرماندەی هێزی سەربازیی وڵاتی ئەڵمانیا لە هەرێمی کوردستان چەپکەگووڵی رێز و وەفای لەسەر مەزاری سەرۆک مام جەلال دانا و  بیرەوەری خۆی لە تیانووسی یادەوەرییەکان سەرمەزاری سەرۆک مام جەلال نووسی: " زۆر خۆشحاڵبووین ئەمڕۆ لە سلێمانی هاتینە سەر مەزاری سەرک مام جەلال، گرنگە ڕێز لە بیر و رێبازی مام جەلال بگرین".

باڵیۆز د. محەمەد سابیر هەنگاو بەهەنگاو و قۆناغەکانی ژیانی پیشمەرگایەتی، سیاسی و بوون بە سەرۆک کۆماری عێراقی سەرۆک مام جەلالی بەوێنە پێشانی هێزەکانی ئەڵمانیا و شاندی یاوەریدا. سەرۆکی دامەزراوەی سەرۆک جەلال تاڵەبانی باسی لە کارەکانی دامەزراوەکە کرد و روونیکردەوە کارکردنی دامەزراوەی سەرۆك جەلال تاڵەبانی لە دیدگەی سەرۆک مام جەلال-ەوە سەرچاوەی گرتووە و لەبواری ئەرشیفکردن، رۆشنبیری، کولتووری و زانستی کار دەکات.