دامەزراوەی سەرۆک جەلال تاڵەبانی پێشوازی لە کۆمەڵەی خوێندکاران دەکات

رۆژی سێشەممە رێکەوتی ٢٢ی تەموزی ٢٠٢٥  ئاران غەفور، نوێنەری سەرۆکی یەکێتیی نیشتمانیی کوردستان بۆ کاروباری خوێندکاران و ستافی كۆمەڵەی خوێندكاران سەردانی دامەزراوەی سەرۆک جەلال تاڵەبانی-یان کرد و لەلایەن باڵیۆز د. محەمەد سابیر، سەرۆکی دامەزراوە و شاندێکی دامەزراوەکەوە پێشوازی کران.

لە دیدارێکدا باڵیۆز، د. محەمەد سابیر  لەبارەی دامەزراوەی سەرۆک جەلال تاڵەبانی-یەوە، وتی: " دامەزراوەی سەرۆک جەلال تاڵەبانی دامەزراوەیەکی نا حکومی سەربەخۆی قازانج نەویست و بێلایەنە، کولتووری، مرۆڤایەتی و نیشتمانییە، کاردەکات بۆ ناساندن، پاراستن، ئەرشیفکردنی ژیان و خەباتی سەرۆک جەلال تاڵەبانی".
  
لەو دیدارەدا سەرۆکی دامەزراوەی سەرۆک جەلال تاڵەبانی وتیشی: "ئەم دامەزراوەیە گرنگی زیاتر دەدات بە پەرەپێدانی بواری رووناکبیری و توێژینەوەی ئەکادیمی؛ لەسەر فیکر، ژیان و سیاسەتی سەرۆک جەلال تاڵەبانی".

لە بەشێکی دیکەی دیدارەکەدا هەنگاوەکانی کۆمەڵەی خوێندکارانی کوردستان بۆ خزمەتی خوێندکاران و بەرەوپێشچوونی رەوتی خوێندن گفتوگۆی لەبارەوەکرا و ستراتیژی کۆمەڵەکە بۆ ساڵی نوێی خوێندن تاوتوێکرا.

لەبەرانبەردا باڵیۆز د. محەمەد سابیر، سەرۆکی دامەزراوەی سەرۆک جەلال تاڵەبانی ستایشی کارەکانی کۆمەڵەی خوێندکارانی کوردستان کرد و ئاماژەی بەوەکرد، ئەوەی لە ساڵی رابردوودا بۆ خزمەتی خوێندکاران و زانکۆ و پەیمانگەکانی کوردستان ئەنجامتانداوە مایەی شانازییە و هەوڵەکانتان بەرز دەنرخێنین.