پرسەنامەیەک لە دامەزراوەی سەرۆک جەلال تاڵەبانییەوە

 
بە دڵێکی پڕ ئازار و خەمێکی قوڵەوە، پرسە و سەرەخۆشی خۆمان ئاراستەی هاوڵاتیان و کەس و کاری شەهیدانی بێگوناهی کارەساتەکەی شاری کوت دەکەین کە لەم ڕووداوە سەخت و دڵتەزینەدا گیانیان لەدەستدا. 

ئێمە لە دامەزراوەی سەرۆک جەلال تاڵەبانی، بە سەرۆکایەتی باڵیۆز د. محەممەد سابیر و هەموو کارمەندەکانی، لە ناخی دڵەوە پرسە و سەرەخۆشی خۆمانتان ئاراستە دەکەین، هیوادارین دواناخۆشیتان بێت. ئەمڕۆکە ئێمە شانبەشانی خەڵکی کوت دەوەستین، هەر وەک هەمیشە لەگەڵ هەر بەشێکی ئازاری ئەم وڵاتەدا بووین و دەبین . ئەوەی ڕوویدا کارەساتێکی کاتی نییە، بەڵکو برینێکی قوڵە لە دڵی عێراق و هاوارێکی بەهێزە بەرانبەر بە ویژدانی مرۆڤایەتی بۆ بەهەندوەرگرتنی رۆحی رۆڵەکانی ئەم نیشتمانە. 

ئێمە لەم نەهامەتییەدا لەگەڵتانین و بڕوامان وایە ڕێزگرتن لە قوربانییەکانی کوت لە ڕوونکردنەوەی ڕاستی ڕووداوەکەدایە و پێویستە دڵنیایی بدرێت کە ئەم جۆرە کارەساتانە دووبارە نەبنەوە.  

خوای گەورە لە شەهیدان خۆش بێت،  سوکنایی بە خێزانەکانیان ببەخشێت و شیفا بۆ برینداران بنێرێت. بەو ئومێدەی کە ئەم کارەساتە ببێتە هەوێن بۆ تۆکمەکردنی بەرپرسیاریەتی نیشتمانی، بەرزکردنەوەی بەهای مرۆڤ و گەڕاندنەوەی ڕێزی هاوڵاتی.  

إِنَّا لِلَّهِ وَإِنَّا إِلَيْهِ رَاجِعُونَ  
براتان  
باڵێۆز د. محەمەد سابیر ئیسماعیل
سەرۆکی دامەزراوەی سەرۆک جەلال تاڵەبانی