پرسە و سەرەخۆشی باڵیۆز د. محەمەد سابیر بەبۆنەی کۆچی دوایی زانای پایەبەرز، بەڕێز محەمەد عەلی بەحر لعلوم

بەناوی خوای بەخشندە و میهرەبان 
         
﴿يَا أَيَّتُهَا النَّفْسُ الْمُطْمَئِنَّةُ ارْجِعِي إِلَى رَبِّكِ رَاضِيَةً مَرْضِيَّةً﴾
برای بەڕێزم د. ئیبراهیم بەحرلعلوم،  
سڵاوی خوای گەورەتان لێبێت

بەخەم و دڵتەنگییەکی  زۆرەوە هەواڵی کۆچی دوایی زانای گەورە و پایەبەرز، محەمەد عەلی بەحرلعلوم-مان پێگەیشت. ئەم زانایە گەورەیە ژیانی خۆی تەرخان کرد بۆ خزمەتی ئایین، زانست و کۆمەڵگە. ئێمە لەم کۆستە گەورەیە لەگەڵ ئێوەدا هاوبەش و هاوخەمین و لەناخی دڵەوە پرسە و سەرەخۆشی خۆمان ئاراستەی ئێوە و خانەوادەی بەڕێزتان دەکەین.
 لە خوای گەورە دەپاڕێینەوە، کە بە میھرەبانیی بێ پایانی خۆی لە کۆچکردوو خۆش بێت و  بە بەهەشتی بەرینی شاد بکات و سوکنایی و  ئارامیش بە ئێوە و خانەوادە بەڕێزەکەتان ببەخشێت.  
لەدەستدانی ئەم کەسایەتییە زانستی و رۆحانییە  زیانێکی گەورەیە، بەڵام میراتە زانستی و مرۆڤایەتییەکەی وەک مەشخەڵێک رووناکی دەبەخشێت بە نەوەکانی ئەم وڵاتە و یادەوەرییەکەی هەمیشە لە دڵی هاوڕێ و خوێندکارەکانیدا دەمێنێتەوە.  

براتان،  
باڵیۆز د. محەمەد سابیر ئیسماعیل، سەرۆکی دامەزراوەی سەرۆک جەلال تاڵەبانی