دامەزراوەی سەرۆک جەلال تاڵەبانی یاداشتنامەی لێکتێگەیشتن لەگەڵ کۆمەڵەی کوردی بۆ کاروباری سیاسی دەرەکی لە بەرلین واژۆ دەکات

رۆژی شەممە رێکەوتی ١٣ی ١٢ی ٢٠٢٥ رێژەن حەسەن، بەڕێوەبەری ئەرشیفی دامەزراوەی سەرۆک جەلال تاڵەبانی بەنێونەرایەتیی دامەزراوەکە یاداشتی لێکتێگەیشتن لەگەڵ کۆمەڵەی کوردی بۆ کاروباری سیاسی دەرەکی لە بەرلین واژۆ کرد.

لە لێکتێگەیشتنەکەدا ئاماژەکراوە بە "هاوبەشی و هاوکاریی نێوان هەردوو لا لە کۆکردنەوەی ئەو بەڵگەنامانەی کە تایبەتن بە سەرۆک جەلال تاڵەبانی لە وڵاتانی ئەوروپا بەتایبەت ئەڵمانیا".
لە بەشێکی دیکەی لێکتێگەیشتنەکەدا ئاماژەش بەوە کراوە "هاوبەشی و هاوکاریی نێوان هەردوو لا لە کۆکردنەوەی ئەو بەڵگەنامانەی کە پەیوەندی بە کوردو کوردستانەوە هەیە و تایبەتمەندی ئەرشیفیان هەیە وەک بەشێک لە ئەرشیفیی نیشتمانی".

لەو لێکتێگەیشتنەدا لەبارەی چالاکی هاوبەشەوە هاتووە "هەماهەنگی نێوان هەردوو لا بۆ بەشداریکردن لە چالاکی و کۆنفرانسی نێودەوڵەتیی تایبەت بە کاری کەلتووری و ڕۆشنبیری‌ لە بوارەکانی (مێژوو، زمان، سیاسەتی کەلتووری، ئەرشیف،پەروەردە، ژینگە...) لە ئەڵمانیا.

لە یەکێک لە خاڵەکانی دیکەی لێکتێگەشتنەکە ئاماژە بە "دروستکردنی پەیوەندی لەگەڵ ڕێکخراوە کوردی و ئەڵمانییەکان بەمەبەستی ئەنجامدانی کاری هاوبەش لە بوارەکانی (گەشەپێدانی مرۆیی، ژینگە، پەروەردە، تەندروستی و ئەرشیف و بەڵگەنامە...) هەر بوارێکیتر کە لەگەڵ سیاسەتی کارکردنی هەردوولادا بگونجێت".

کۆمەڵەی کوردی بۆ کاروباری سیاسی دەرەکی؛ کار دەکات لەسەر بواری پەیوندییە کولتووریە کوردییەکان و سیاسەتی کولتووری و گەشەپێدانییان لە وڵاتی ئەڵمانیا.