لە یادی مورافەعە مێژووییەکەی سەرۆک مام جەلال-دا

لە یادی مورافەعە مێژووییەکەی سەرۆک مام جەلال-دا

رۆژی مۆڕافەعەکە؛ رۆژی راگەیاندنی کوردستانیبوونی کەرکوک لەلایەن سەرۆک مام جەلال-ەوە

ڕۆژی ٩/٢/٢٠٠٤ لە کۆبوونەوەیەکی بەرفراوانی ئەنجوومەنی حوکمی عێراقدا، سەرۆک مام جەلال، سکرتێری یەکێتیی نیشتمانی کوردستان، وتەیەکی گرنگی مێژوویی و پڕ بایەخی پیشکەشی ئەنجومەنی حوکم کرد.
سەرۆک تاڵەبانی لە کۆبوونەوەکەدا ئەوبڕگەیەی بڕیاری عوسبەتولئومەمی خوێندەوە کە دەڵێت (هەرگیز سنوری عێراق لە جەبەل حەمرین تێنەپەڕیوەو لە جەبەل حەمرین بەولاوە کوردستانە) هاوکات نەخشەیەکی مێژوویی دێرینی سەردەمی عوسمانی لەسەر مێزی ئەنجومەنی حوکم خستەڕوو کە تیایدا بە ئاشکرا دیارە کەرکوک بەشێکە لە کوردستان،
 

زمانی کوردی و مورافەعەکە

هەر لەكاتی خستنەڕووی مورافەعە مێژووییەكەیدا، سەرۆك تاڵەبانی ئاماژەی بەوەشدا مافی گەلی كورد رەوایە، دەبێت دانبنرێن بە زمانی کوردیدا كە زمانێكی رەسمی وڵاتەو هاوشێوەی زمانی عەرەبییە، هەروەها كاریش بكرێت لەسەر كۆتایی هاتنی سیاسەتی راگواستن و سڕینەوەی ناسنامەی نەتەوەی کورد

سەرۆک مام جەلال داوایکرد کە کورد و تورکمانی ڕاگوێزراو لە کەرکوک بگەڕێنەوە شاری کەرکوک و دواتریش راپرسی بۆ دەستنیشانکردنی ناسنامەی شارەکە بکرێت.
سەرۆک مام جەلال وتیشی: "پێویستە مافەكانی گەلی كوردستان لە یاسای بەڕێوەبردنی كاتی دەوڵەتدا بسەلمێندرێن ‌و راستییەكانی پەیوەست بە گەلی كوردستانەوە خستەڕوو".

هەروەك روونیكردەوە كە ئەمڕۆ کوردستان لەنێوان چوار دەوڵەتدا دابەشكراوە، ئەوانیش توركیا، عیراق، ئێران ‌و سوریان.

سەرۆك مام جەلال راشیگەیاند: "گەلی كوردستان لە ساڵی 1925 دا بە بڕیارێكی عوسبەتولئومەم بە دەوڵەتی عیراقەوە لكێندراوە، هەروەك وتەیەكی ئەدمۆنز نوێنەری بەریتانیای لە لیژنەی كۆمەڵەی نەتەوەكان بۆ دیاریكردنی چارەنووسی ویلایەتی موسڵ لەوكاتەدا بەبیر ئامادەبووانی هێنایەوە كە تێیدا دەڵێت: كوردستانی باشوور بە چەند مەرجێك لكێندراوە بە عیراقەوە لەوانە:

"دەبێت بەڕێوەبەرانی ئەم ناوچە كوردستانییە كورد بن ‌و زمانی كوردیش زمانی رەسمی بێت‌ و بارودۆخی كوردستان وەك خۆی بهێڵدرێتەوە".

کوردستانیبوونی کەرکوک

هەروەها سەرۆک مام جەلال ئاماژەی بۆ كتێبی "قاموس ئەلئەعلام" كرد ئەو بڕگەیەی لێ خوێندەوە كە دەڵێت: سێ بەشی دانیشتووانی كەركوك كوردن.

بەمەش سەرۆک مام جەلال جارێکیتر بە بەڵگەی مێژوویی کوردستانیبوونی کەرکوکی بۆ ئەنجومەنی حوکم و دوست و دوژمن سەلماندەوە.

ئەمڕۆ ٢٢ساڵ بەسەر  ئەو رۆژی مێژوویەدا تێدەپەڕێت، دەبێت سەرکردەکانی یەکێتی و کورد خەبات و تیکۆشانیان چڕتر بکەنەوە بۆ هێنانەدی ناوەڕۆکی مورافەعە مێژوویەکەی سەرۆک تاڵەبانی و دید و بۆچوونەکانی مام و ڕێبازەکەی.