دامەزراوەی سەرۆک جەلال تاڵەبانی رووبەری سەوزایی لە شاری سلێمانی زیاد دەکات

رۆژی پێنجشەممە رێکەوتی ١٥ی ١ی ٢٠٢٦، باڵیۆز د. محەمەد سابیر، سەرۆکی دامەزراوەی سەرۆک جەلال تاڵەبانی پێشوازی لە شاندێکی وەزارەتی ژینگەی عێراق راسپێردراو لەلایەن د. هەڵۆ عەسکەری، وەزیری ژینگەی عێراق و د. ئیکتفاء حەسناوی، بریکاری وەزیری ژینگە بە سەرۆکایەتیی محەمەد عەباس سەیفوڵڵا کرد.
 
وەزارەتی ژینگەی عێراق لە چوارچێوەی ئەو لێکتێگەیشتنەی لەگەڵ دامەزراوەی سەرۆک جەلال تاڵەبانی واژۆیان کردووە بەشێک لە ئەو دارنەمامانەیان رادەستی دامەزراوەکە کرد کە داواکرابوو.

دامەزراوەی سەرۆک جەلال تاڵەبانی کارکردنی لە چوارچێوەی ئامانجەکانی کە لەپێناویدا دروستبووە، گرنگی زیاتر بە ژینگە دەدات و لەئێستادا چاندنی نزیکەی ٣٠ی هەزار دارنەمامی جیاواز و تایبەت لە پارکێکدا بەناوی پارکی شەهیدان بەشێوازێکی مۆدێرن رادەگەیەنێت.

درووستکردنی پارکی شەهیدان دەبێتە زیادکردنی پانتایی سەوزایی لە شاری سلێمانی و سوودمەندبوونی دانیشتوانەکەی و هاوسەنگیی ژینگەیی.

سەرۆکی دامەزراوەی سەرۆک جەلال تاڵەبانی سوپاسی وەزارەتی ژینگەی عێراقی کرد لە پای هاوکاری و بەخشینی ئەو دارنەمامانە بە پارکی شەهیدان و بەڵێنی بەردەوامی و هەوڵەکانی دامەزراوەکەی پێدان بۆ خزمەت کردنی ژینگە.

باڵیۆز د. محەمەد سابیر باسی لەوەش کرد: "بەشداریی راستەقینە دەکەین لە رووبەڕووبوونەوەی گۆڕانکارییە ژینگەیی و کەشوهەوا، ئەوەش پێویستی بە هەماهەنگی هاوبەش هەموو لەلایەنەکان هەیە بۆ کەمکردنەوەی کاریگەرییە خراپەکانی کەشوهەوا".