هاوبەشییەکی نوێی زانستی، دامەزراوەی سەرۆک جەلال تاڵەبانی و کتێبخانەی نیشتمانیی ئیسپانیا کۆدەکاتەوە

لە چوارچێوەی فراوانکردنی ئاسۆی هاوکارییە رۆشنبیری و ئەکادیمییەکان، باڵیۆز د. محەمەد سابیر، سەرۆکی دامەزراوەی سەرۆک جەلال تاڵەبانی و شاندی یاووەری، سەردانێکی فەرمی بۆ کتێبخانەی نیشتمانی لە شانشینی ئیسپانیا ئەنجامدا. 

لە دیدارێکدا میکانیزمەکانی پەرەپێدانی کارە ئەرشیفییەکانی تایبەت بە دامەزراوەکە لەبارەی سەرۆک مام جەلال و ڕێگاکانی پاراستنی  مێژوویی ئەرشیفی و بەڵگەنامەیی بەگوێرەی نوێترین پێوەرە جیهانییەکان تاوتوێ کران.

لە بەشێکی دیکەی دیدارەکەدا باس لە ئەگەری دەستپێکردنی هاوکارییەکی هاوبەش کرا بۆ ڕێکخستنی ئەرشیفی دامەزراوەکە بە شێوازێکی سەردەمیانە، هەروەها سوودوەرگرتن لە تەکنەلۆژیای پێشکەوتوو لەبوارەکانی ئەرشیفکردنی دیجیتاڵی و بەڕێوەبردنی بەڵگەنامەکان، بە جۆرێک ببێتە هۆی پاراستنی یادەوەری نیشتمانی و گەیاندنی بە نەوەکانی داهاتوو. 

جگە لەوەش، هەردوولا هەنگاوەکانی واژۆکردنی یاداشتنامەیەکی لێکتێگەیشتنی هاوبەشیان لەم بوارەدا تاوتوێ کرد، بە ئامانجی چەسپاندنی هاوکارییە دامەزراوەیی و ڕۆشنبیرییەکانی نێوان هەردوولا.

شاندەکەی دامەزراوەی سەرۆک جەلال تاڵەبانی لەلایەن خافیێر ئۆرتێگا ئەلڤارێز، بەڕێوەبەری ڕۆشنبیری کتێبخانەی نیشتمانی، و ئیزابێل هێرناندێز، بەڕێوەبەری پەیوەندییە دامەزراوەییەکان و پرۆتۆکۆڵ لە کتێبخانەکە، پێشوازییان لێکرا. ناوبراوان خۆشحاڵی خۆیان بۆ ئەم دەسپێشخەرییە گرنگە دەربڕی و ستایشی ڕۆڵی دامەزراوەی سەرۆک جەلال تاڵەبانییان کرد لە پاراستنی ئەرشیفی مێژوویی سەرۆکی مام جەلال  و بەهێزکردنی دیالۆگی ڕۆشنبیری نێودەوڵەتی.

سەردانەکە دیدارێکی بەرهەمدار و بونیادنەری بەخۆیەوە بینی،  ڕەنگدانەوەی ئارەزوویەکی هاوبەش بوو بۆ پەرەپێدانی پرۆژە ئەرشیفییە نوێیەکان هاوکارییە زانستی و ڕۆشنبیرییەکانی نێوان دامەزراوەی سەرۆک جەلال تاڵەبانی و کتێبخانەی نیشتمانی لە شانشینی ئیسپانیا بەهێزتر دەکات.