"فڕۆکەخانەی نێودەوڵەتیی جەلال تاڵەبانی" لە جیاتی "فڕۆکەخانەی نێودەوڵەتیی سلێمانی"دەبێت

راگەیاندنی فەرمی: ناوی "فڕۆکەخانەی نێودەوڵەتیی جەلال تاڵەبانی" لە جیاتی "فڕۆکەخانەی نێودەوڵەتیی سلێمانی"دەبێت لە رێکەوتی ١٩ی ئازاری ٢٠٢٦ەوە

دەسەڵاتی فڕۆکەوانیی شارستانیی عێراق بە فەرمی بڕیاریدا ناوی "فڕۆکەخانەی نێودەوڵەتیی جەلال تاڵەبانی" لە جیاتی "فڕۆکەخانەی نێودەوڵەتیی سلێمانی" جێگیر بکرێت، ئەمەش بەپێی ئەو هەموارەی  لەلایەن دەسەڵاتی فڕۆکەوانیی شارستانیی عێراقەوە لە چوارچێوەی بڵاوکراوەی زانیارییەکانی فڕۆکەوانیدا (AIP Amendment) دەرچووە.

بڕیاری گۆڕینی ناوەکە لە ١٩ی ئازاری ٢٠٢٦ەوە دەچێتە بواری جێبەجێکردنەوە، تێیدا ناوی نوێ لە سەرجەم نووسراوە فەرمییەکان، نەخشە، گەشتە ئاسمانییەکان و بەڵگەنامە پەسەندکراوە پەیوەندیدارەکاندا جێگیر دەکرێت.

ئەم ڕێکارە لە چوارچێوەی ئەو نوێکارییە فەرمییانەدایە لە کەرتی فڕۆکەوانیی شارستانیی عێراقدا پەسەند کراون، کە هەموارکردنی کۆد، نیشانە و زانیارییە تەکنیکییەکانی پەیوەست بە فڕۆکەخانەکە دەگرێتەوە.