پیرۆزبایی دامەزراوەی سەرۆک جەلال تاڵەبانی بەبۆنەی ٣٥هەمین ساڵڕۆژی هەڵگیرسانی راپەڕینە مەزنەکەی کوردستان-ەوە

کەسوکاری سەربەرزی شەهیدان، هاوڵاتییانی شاری رانیەی خۆشەویست، هاوڵاتییانی هەرێمی کوردستان

بەبۆنەی تێپەڕبوونی (٣٥) ساڵ بەسەر راپەڕینی خەڵکی سەربەرزی کوردستاندا (راپەڕینی ئاداری 1991)، پیرۆزبایی لە کەسوکاری سەربەرزی شەهیدان، پێشمەرگە قارەمانەکان، گەلی کوردستان و سەرجەم هاوڵاتییانی خۆڕاگریی کوردستان دەکەین.

ئەوەی ئەمڕۆ خاوەنین و بەدەستهاتووە بەری رەنجی خوێن و قوربانیدانی شەهیدان و دەست و مەچکی خەڵکی راپەڕیوی راپەڕینە، پاراستن و هێشتنەوەی سەروەرییەکانی راپەڕین و پیرۆززانینی ئەرکی لە پێشینەمان بێت.

 لەئێستادا کوردستان و عێراق  بە دۆخێکی نائارامی و شەڕ تێدەپەڕێت، هیوادارین لەم یادەدا هەوڵی زیاتری ئارامی بۆ کوردستان بدەین وڵاتمان بە دوور بگرین لە هەر تێوەگلانێک لە شەڕ و ماڵوێرانی، ئەم  یادە بکەینە هەوێنی زیاتری قۆڵكردنەوەی گیانی برایەتی، تەبایی و یەكڕیزی نێوماڵی کوردستان.

لەلایەکی دیکەشەوە داواکارین هێز و لایەنە سیاسییەکانی هەرێمی کوردستان ململانێکانیان وەلابنێن و خەبات بکەن بۆ خزمەتکردنی کۆمەڵانی خەڵکی کوردستان و چارەسەرکردنی ریشەیی کێشەکان.

ئەوەی پێویستە لەم یادەدا بووترێت راپەڕین؛  بە رابەرایەتی و تێکۆشانی سەرۆک مام جەلال و یەکێتیی نیشتمانیی کوردستان و خوێنی شەهیدان هاتووەتە دی، دەخوازین تەبایی و یەکڕیزی لەپێناو یەکگرتوویی و کورد و ئامانجە وەدینەهاتووەکانمان  و داکۆکی لە مافە دەستوورییەکانی گەلی کوردستان لەم بۆنەیەدا زیاتر هەوڵ و تێکۆشانی بۆ بکرێت.
 بەرز و پیرۆزبێت ئەم یادە مەزنە

باڵیۆز د. محەمەد سابیر
سەرۆکی دامەزراوەی سەرۆک جەلال تاڵەبانی 
 ئاداری ٢٠٢٦