سەردانی دامەزراوەی سەرۆک جەلال تاڵەبانی بۆ لای سەرۆک کۆمار: پیرۆزبایی بە بۆنەی وەرگرتنی پۆستەکەی و گفتوگۆکردن لەسەر ئاسۆی هاوکاری هاوبەش

ئەمڕۆ پێنجشەممە ١٦ی نیسانی ٢٠٢٦، سەرۆکی دامەزراوەی سەرۆک جەلال تاڵەبانی، باڵیۆز د. محەمەد سابیر و شاندی یاوەری، سەردانی سەرۆک کۆمار نزار ئامێدییان کرد لە کۆشکی بەغداد. لەمیانەی سەردانەکەدا  پیرۆزبایی گەرم ئاراستەی بەڕێز نزار ئامێدی کرا بە بۆنەی وەرگرتنی پۆستی سەرۆک کۆمار و لەهەمان کاتدا گفتوگۆ لەسەر چەند دۆسیەیەک کرا کە جێی بایەخی هەردوولا بوو.

لە میانەی دیدارەکەدا، سەرۆکی دامەزراوە و شاندی یاوەری پیرۆزبایی گەرمیان ئاراستەی  سەرۆک کۆمار کرد و هیوای سەرکەوتنیان بۆ خواست لە جێبەجێکردنی ئەرکە نیشتمانییەکاندا.
هەروەها گفتوگۆ لەسەر چالاکییەکانی دامەزراوە و پرۆگرامەکانی ئایندە و ڕێگاکانی بەهێزکردنی هاوکاری بۆ خزمەتکردنی کۆمەڵگا و بەشداریکردن لە چەسپاندنی بەهای یەکێتی و برایەتی لە نێوان گەلی عێراق کرا.

لە لای خۆیەوە، سەرۆک کۆمار سوپاس و پێزانینی خۆی بۆ ئەم سەردانە دەربڕی و   سیاسەت و خەباتی سەرۆکی کۆچکردوو مام جەلال تاڵەبانی و ڕۆڵی بەرچاوی لە چەسپاندنی بناغەکانی پرۆسەی دیموکراسی و بەهێزکردنی یەکگرتوویی نیشتیمانی هێنایەوە یاد.
بەڕێز سەرۆک کۆمار جەختیشی لەسەر گرنگی ئەو ڕۆڵە کردەوە کە دامەزراوە لە ڕێگەی پرۆگرام و دەستپێشخەرییە پاڵپشتەکانی بۆ  پێکەوەژیانی ئاشتیانە دەیبینێت.

لە کۆتایی دیدارەکەدا، هەردوولا جەختیان لە پێویستی بەردەوامی کارکردنی هاوبەش و بەهێزکردنی ڕێگاکانی پەیوەندی و هاوئاهەنگی کردەوە، بە شێوەیەک کە پشتیوانی لە سەقامگیری نیشتیمانی بکات و خزمەتی بەرژەوەندییە باڵاکانی وڵات بکات.