دامەزراوەی سەرۆك جەلال تاڵەبانی و دەستەی كوردستانی بۆ دراساتی ستراتیجی و توێژینەوەی زانستی ، پرۆژەی هاوبەش ئەنجام دەدەن

ئەمڕۆ سێشەممە 28-4-2026،  باڵیۆز د. محەمەد سابیر سەرۆکی دامەزراوەی سەرۆک جەلال تاڵەبانی و وەڤدی یاوەری پێشوازیانکرد لە پرۆفیسۆر د.شوان كەمال رەشید سەرۆكی دەستەی كوردستانی بۆ دراساتی ستراتیجی و توێژینەوەی زانستی و بەشێک  لە مامۆستایان و توێژەرانی دەستە.

هەردوولا گفتوگۆی وردیان كرد لەبارەی پەرەپێدانی پەیوەندییەكان و ئەنجامدانی پرۆژەی هاوبەش لە بوارەكانی: گۆڕانكارییەكانی ژینگە و ئاسایشی خۆراك، تەكنەلۆژیا، زانیارییە تەندروستییەكان و پەرەپێدانی ئابووریی، رەخساندنی هەلی كار و راهێنانی پیشەیی بۆ گەنجان و دەرچووان.

هەر لە كۆبوونەوەكەدا چەندین پێشنیاز و بۆچوونی زانستیی گەڵاڵەكران بە ئامانجی بەهێزكردنی توێژینەوەكان و چارەسەركردنی كێشەی كەموكورتیی داتاكان. بۆ ئەم مەبەستەش و وەك هەنگاوێكی كردەیی، بڕیاردرا بەمنزیكانە یاداشتێكی لێكتێگەیشتنی ستراتیژیی لە نێوان هەردوولادا ئیمزابكرێت، بۆ ئەوەی ببێتە بنەمایەك بۆ یەكخستنی توانستە ئەكادیمییەكان و سەكۆ كاریگەرەكانی دامەزراوەی سەرۆك جەلال تاڵەبانی، لە خزمەتكردنی زیاتری زانست و كۆمەڵگەدا.