دامەزراوەی سەرۆک جەلال تاڵەبانی یاداشتنامەی لێکتێگەیشتن لەگەڵ دامەزراوەی ئای تۆک واژۆ دەکات

دامەزراوەی سەرۆک جەلال تاڵەبانی یاداشتنامەی لێکتێگەیشتن لەگەڵ دامەزراوەی ئای تۆک واژۆ دەکات

رۆژی دووشەممە رێکەوتی ١٨ی ئایاری ٢٠٢٦، سەرۆکی دامەزراوەی سەرۆک جەلال تاڵەبانی، باڵیۆز د. محەممەد سابیر و شاندێکی یاوەری، سەردانی دامەزراوەی  ئای تۆک-یان کرد لە شاری سلێمانی. شاندەکە لەلایەن بەرێز داستان تۆفیق خدر، بەڕێوەبەری  ئای تۆک و ستافی دامەزراوەکە پێشوازییان لێکرا.

لە میانەی سەردانەکەدا گفتوگۆ لەسەر هەماهەنگیی ستراتیژی بۆ پەرەپێدانی تواناکانی گەنجان و کارکردن لەسەر پرۆژە کەلتووری و دیپلۆماسییەکان کرا.

 هەروەها باس لە بوونیادنانی چوارچیوەیەکی گشتی کرا  بۆ هەماھەنگی لەنێوان دامەزراوەی سەرۆک سەرۆک جەلال تاڵەبانی و ئای تۆک بۆ کارکردنی هاوبەش لەسەر پرۆژە نیشتمانی و نێودەوڵەتییەکان، ئامانج لێیان بەهێزکردنی رۆڵی گەنجانە لە بوارەکانی دیپلۆماسی، کەلتوور و سەرکردایەتیدا.

لە کۆتایی کۆبوونەوەکەدا یادداشتنامەیەکی لێکتێگەیشتن لەنێوان هەردوو دامەزراوەدا واژۆ کرا. باڵیۆز د. محەممەد سابیر ئەم یاداشتنامەیەی بەرز نرخاند و  جەختی لەوە کردەوە ئاوێنەی ویستێکی هاوبەشە بۆ بەهێزکردنی تواناکانی گەنجان و پاراستنی ڕێبازی سەرۆک مام جەلال لەڕێگەی دەستپێشخەرییە پەروەردەیی و کەلتوورییە کاریگەرەکانەوە. 

بەڕێوەبەری ئای تۆک لای خۆیەوە سوپاسی سەرۆکی دامەزراوەی سەرۆک جەلال تاڵەبانی کرد و  دووپاتی کردەوە کە دامەزراوەی ئای تۆک پابەندە بە پەیوەندیی  توندوتۆڵ و  کاری هاوبەشی رژد لەگەڵ دامەزراوەی سەرۆک جەلال تاڵەبانی-دا بۆ جێبەجێکردنی بەرنامەی هاوبەش لەپێناو ئامادەکردنی گەنجان بۆ رۆڵی سەکردایەتی لەسەر ئاستی نیشتمانی و نێوەدەوڵەتیدا.