باڵیۆزی فەرەنسا لە عێراق سەردانی مەزاری سەرۆک مام جەلال دەکات

رۆژی سێشەممە رێکەوتی ٧ی تەمووزی ٢٠٢٦ باڵیۆز د. محەمەد سابیر، سەرۆکی دامەزراوەی سەرۆک جەلال تاڵەبانی و بەڕێز یوسف زۆزانی، جێگری سەرۆکی دامەزراوەکە و شاندێکی مەکتەبی سکرتاریەتی سەرۆک مام جەلال پێشوازیان لە بەڕێز پاتریک دۆرێل، باڵیۆزی فەرەنسا لە عێراق و بەڕێز یان برایم، كونسوڵی گشتیی فەرەنسا لە هەرێمی كوردستان و شاندی یاوەری کرد.

شاندەکەی باڵیۆزخانەی فەرەنسا لە عێراق چەپکەگوڵی رێز و وەفایان لەسەر مەزاری سەرۆک مام جەلال دانا و باڵیۆزی فەرەنسا لە تیانووسی یادەوەرییەکان سەر مەزارەکە بەشکۆوە ئاماژەی بە رۆڵی سەرۆک مام جەلال کرد و پەیوەندییە باشەکانی عێراق و وڵاتی فەرەنسا لە سەردەمی سەرۆکایەتیی سەرۆک مام جەلال وەک سەرۆک کۆماری عێراق بەرز نرخاند و لە کارەکانی رابردووی سەرۆک مام جەلالی لە پێشخستنی پرۆسەی ئاشتی، گفتوگۆ، دیموکراسی و نزیککردنەوەی نێوان پێکهاتە جیاوازەکانی عێراقی بە گرنگ وەسف کرد.

باڵیۆزی فەرەنسا سەرۆک مام جەلالی وەک سیمبولێکی یەکڕیزی، ئاشتی و هاوبەشی نیشتمانی لە یاد و هۆشی گشتیی عێراقدا پیشاندا.