دامەزراوەی سەرۆک جەلال تاڵەبانی و یونسکۆ تاوتوێی ڕاگەیاندنی بەرنامەیەکی کاری هاوبەش دەکەن بۆ جێبەجێکردنی چەند پڕۆژەیەکی ڕاهێنان لە عێراقدا

دامەزراوەی سەرۆک جەلال تاڵەبانی لە بەغداد کۆبوونەوەیەکی لەگەڵ دکتۆر زیا سابت ئەلسەرای، بەرپرسی کەرتی پەیوەندی و زانیاری لە نووسینگەی یونسکۆ لە عێراق ئەنجامدا بە مەبەستی تاوتوێکردنی ڕێگاکانی بەهێزکردنی هاوکاری دامەزراوەیی و ڕاگەیاندنی بەرنامەیەکی کاری هاوبەش لە بوارەکانی پەروەردە، ڕاگەیاندن، ڕۆشنبیری و بەهێزکردنی تواناکانی گەنجان.

لە کۆبوونەوەکەدا هەردوولا ڕێککەوتن  لەسەر ئامادەکردنی پلانێکی کازی هاوبەش کە زنجیرەیەک بەرنامە، وۆرکشۆپی ڕاهێنان و سیمیناری پسپۆڕی لەخۆدەگرێت. شایەنی باسە کە خوێندکاران، گەنجان، ڕاگەیاندنکاران و ڕێکخراوەکانی کۆمەڵگەی مەدەنی لە بەغداد و سلێمانی لەم چالاکییانەدا بەشدار دەبن بە شێوازێک کە  لەگەڵ ئەولەویەتەکانی ڕێکخراوی یونسکۆ و پەیامی دامەزراوەی سەرۆک جەلال تاڵەبانی-دا بگونجێت لە پاڵپشتیکردنی گەشەپێدانی مرۆیی و بونیاتنانی تواناکاندا.

تەوەرەکانی ڕێککەوتنەکە ئەمانە لەخۆدەگرن: بەکارهێنانی بەرپرسیارانە و ئەخلاقییانەی ژیریی دەستکرد، پەروەردەی ڕاگەیاندن و زانیاری و بەرەنگاربوونەوەی چەواشەکاری میدیایی، ئاسایشی دیجیتاڵی و خۆپاراستن لە هەڕەشەی ئەلیکترۆنی، پاراستنی ژینگە و گۆڕانی کەشوهەوا، بونیاتنانی ئاشتی و پەرەپێدانی کەلتوری پێکەوەژیان، بەهێزکردنی گەنجان و پەرەپێدانی کارامەیی سەرکردایەتی، پاراستنی شوێنەوار و کەلەپوور، چەسپاندنی بنەماکانی هاوڵاتێتی دیجیتاڵی، لەگەڵ پەرەپێدانی کارامەییەکانی پەیوەندیکردن، ڕاگەیاندن و دروستکردنی ناوەڕۆکی دیجیتاڵیی ئامانجدار.

هەردوولا جەختیان کردەوە کە ئەم هاوبەشییە هەنگاوێکی گرنگە بەرەو جێبەجێکردنی بەرنامەی جۆری و بەردەوام کە کاریگەر دەبێت لە بەرزکردنەوەی هۆشیاری کۆمەڵایەتی، بونیاتنانی تواناکانی گەنجان، و چەسپاندنی بەهاکانی گفتوگۆ، داهێنان و گەشەپێدان، بە شێوازێک کە خزمەت بە کۆمەڵگە بکات و هاوتەریب بێت لەگەڵ گۆڕانکارییە مەعریفی و تەکنەلۆژییە جیهانییەکاندا.