دامەزراوەی سەرۆک جەلال تاڵەبانی لەگەڵ ڕاوێژکاری سەرۆک وەزیران بۆ کاروباری سیاسی کۆدەبێتەوە

لە چوارچێوەی هەوڵەکانیدا بۆ بەهێزکردنی پەیوەندی لەگەڵ دامەزراوەکانی دەوڵەت، شاندێکی دامەزراوەی سەرۆک جەلال تاڵەبانی لە بەغداد سەردانی دکتۆر حازم وەتەن، ڕاوێژکاری سەرۆکی ئەنجومەنی وەزیران بۆ کاروباری سیاسی کرد.
لە دیدارەکەدا ڕێگاکانی کاری هاوبەش تاوتوێ کران و لای خۆیەوە دکتۆر حازم وەتەن پاڵپشتی خۆی بۆ پەیام، چالاکی و پڕۆژەکانی دامەزراوەکە لە بەغداد دووپاتکردەوە و ستایشی ڕۆڵی دامەزراوەکەی کرد لە چەسپاندنی بەها نیشتمانی و مرۆییەکاندا.
هەروەها دکتۆر وەتەن یادەوەری ڕێبازی نیشتمانی سەرۆکی کۆچکردوو جەلال تاڵەبانی و ڕۆڵی سەرەکی ئەوی بەرز نرخاند لە لێکنزیککردنەوەی ڕاوبۆچوونەکان، پەرەپێدانی  گفتوگۆ و بەشداریکردن لە چارەسەرکردنی کێشە نیشتمانییەکاندا بە گیانی دانایی و هاوسەنگی، جەختیشی کردەوە کە  ڕێبازی ئەو وەک نموونەیەکی باڵا دەمێنێتەوە کە لە کاری سیاسی و بونیاتنانی ئاشتی کۆمەڵایەتیدا چاوی لێ دەکرێت.