دامەزراوەی سەرۆک جەلال تاڵەبانی گرنگیی زانستەکانی بۆشایی ئاسمان و فڕۆکەوانی لە بوونیادنانی تواناکانی گەنجاندا لەگەڵ کاپتن فەريد لەفتە تاوتوێ دەکات

دامەزراوەی سەرۆک جەلال تاڵەبانی پێشوازی کرد لە کاپتن فەريد لەفتە، دامەزرێنەری دامەزراوەی کاپتن فەريد لەفتە بۆ زانستەکانی بۆشایی ئاسمان و فڕۆکەوانی. سەردانەکە تیشکی خستە سەر گرنگیی زانستەکانی بۆشایی ئاسمان و فڕۆکەوانی و ڕۆڵیان لە بەهێزکردنی توێژینەوەی زانستی و پەرەپێدانی تواناکانی گەنجان، جگە لە خستنەڕووی ئاسۆکانی هاوکاری بۆ پشتیوانیکردنی دەستپێشخەرییە زانستییەکان.
لە کۆبوونەوەکەدا، بەڕێز، باڵیۆز د. محەمەد سابیر، سەرۆکی دامەزراوەی سەرۆک جەلال تاڵەبانی جەختی کردەوە کە دامەزراوەکەیان گرنگییەکی زۆر بە پشتیوانی ئەو دەستپێشخەرییە زانستی و مەعریفیانە دەدات کە کاریگەرن بۆ تواناسازیی گەنجانی عێراق، ئەوەش لەسەر بنەمای باوەڕبوون بەوەی کە وەبەرهێنان لە زانست و داهێناندا کۆڵەکەیەکی سەرەکییە بۆ بەدیهێنانی گەشەپێدانی بەردەوام.

جەنابی باڵیۆز ئاماژەی بەوەشدا کە زانستەکانی بۆشایی ئاسمان و فڕۆکەوانی لە بوارە ستراتیژییەکانن کە ئاسۆیەکی فراوان لەبەردم نەوەی گەنجدا دەکەنەوە بۆ داهێنان و توێژینەوەی زانستی، هەروەها ئامادەیی دامەزراوەکەی دەربڕی بۆ بەهێزکردنی هاوکاری لەگەڵ لایەنە نیشتمانییە پسپۆڕەکاندا بە شێوازێک کە خزمەت بە کاروانی پێشکەوتنی زانستی لە عێراقدا بكات.

شایەنی باسە کە کاپتن فەريد لەفتە یەکێکە لە کەسایەتییە دیارەکانی عێراق لە بواری فڕۆکەوانیدا؛ بڕوانامەی دبلۆمی لە فڕۆکەوانیی سەربازی لە مۆسکۆ و بڕوانامەی فڕۆکەوانیی مەدەنی لە ئەمریکا بەدەستهێناوە، هەروەها دە ژمارەی پێوانەیی لە کتێبی گینس-دا تۆمارکردووە. جگە لەوەش، وەک نوێنەری عێراق لە یەکەم نێردەی دپلۆماسیدا بۆ ئاژانسی بۆشایی ئاسمانی ڕووسیا بەشداربووە و یەکەم دامەزراوەی عێراقیی تایبەتمەند بە زانستەکانی بۆشایی ئاسمان و فڕۆکەوانی دامەزراندووە کە دامەزراوەیەکی پەسەندکراوە لەلایەن ئەمیندارێتی گشتیی ئەنجومەنی وەزیرانەوە و کاردەکات بۆ بڵاوکردنەوەی ڕۆشنبیریی زانستەکانی بۆشایی ئاسمان و فڕۆکەوانی و پشتیوانیکردنی تواناکانی نیشتمان لەم بوارەدا.