دامەزراوەی سەرۆک جەلال تاڵەبانی تاوتوێ هەماهەنگیی هاوبەش و پلان بۆ کاری داهاتوو لەگەڵ تۆڕی باڵیۆزانی دارولسەلام و رێکخراوی ئاییندەیەکی گەش دەکات

باڵیۆز، د. محەمەد سابیر، سەرۆکی دامەزراوەی سەرۆک جەلال تاڵەبانی، پێشوازیی لە بەڕێز موهەنەد ئەلعەیساوی، سەرۆکی تۆڕی باڵیۆزانی دارولسەلام و بەڕێز محەمەد عەبدولەتیف، بەڕێوەبەری رێکخراوی ئاییندەیەکی گەش کرد.

لە دیدارەکەدا باس لە هەماهەنگیی هاوبەش و بەهێزکردنی پەیوەندییەکانی نێوانیان تاوتوێ کرا.
لە بەشێکی دیکەی دیدارەکەدا باس لە چەند پرسێکی جێی بایەخی هاوبەش کرا، کە لە سەروویانەوە چەسپاندنی کولتووری پێکەوەژیانی ئاشتییانە، بەهێزکردنی بەهاکانی گفتوگۆ و قبوڵکردنی یەکتر، هەروەها سوودوەرگرتن لە ڕێبازی رەوانشاد سەرۆک جەلال تاڵەبانی و میراتە نیشتمانی و مرۆییەکەی لە پشتگیریکردنی ئاشتی و لێکنزیکبوونەوەی پێکهاتەکانی کۆمەڵگە.

هاوکات شاندی میوان چەندین بیرۆکە و پێشنیازیان سەبارەت بە پرۆژە و بەرنامە بۆ داهاتوو پێشکەش کرد کە دەکرێت بە هەماهەنگی لەگەڵ دامەزراوەی سەرۆک جەلال تاڵەبانی جێبەجێ بکرێن، بە شێوەیەک ببێتە هۆی فراوانکردنی بوارەکانی کاری هاوبەش و بەهێزکردنی دەسپێشخەرییە کولتووری، کۆمەڵایەتی و مرۆییەکان.

هەرسێ لایەن رێککەوتن لەسەر واژۆکردنی یاداشتنامەیەکی لێکتێگەیشتنی هاوبەش تا ببێتە چوارچێوەیەک بۆ هەماهەنگی و جێبەجێکردنی چەندین بەرنامە و پرۆژە و دەسپێشخەری لە قۆناغی داهاتوودا، جەختیشیان کردەوە لەسەر گرنگیی بوونیاتنانی شەراکەتێکی کاریگەر کە پشت بەو بەهایانە ببەستێت کە لە رێبازی سەرۆک جەلال تاڵەبانی-دا رەنگی داوەتەوە و گۆڕینیان بۆ پرۆژەی خاوەن کاریگەریی بەرجەستە و بەردەوام.