دامەزراوەی سەرۆک جەلال تاڵەبانی هاوبەشییەکانی لەگەڵ یونسکۆ بەهێزتر دەکات بۆ پاڵپشتیکردنی دامەزراندنی "هاوپەیمانیی مەدەنی بۆ سۆشیاڵ میدیا" لە عێراق

تیمێکی دامەزراوەی سەرۆک جەلال تاڵەبانی – نووسینگەی بەغداد، بەشدارییان کرد لە وۆرکشۆپێکدا کە لەلایەن رێکخراوی نەتەوە یەکگرتووەکان بۆ پەروەردە و زانست و کلتوور (یونسکۆ) ڕێکخرابوو، بە مەبەستی تاوتوێکردنی هەنگاوە سەرەکییەکانی دامەزراندنی "هاوپەیمانیی مەدەنی بۆ سۆشیاڵ میدیا" لە عێراق، کە لە چوارچێوەی پرۆژەی «سۆشیاڵ میدیا لە پێناو ئاشتیدا»یە و لەلایەن یەکێتیی ئەوروپاوە پاڵپشتی دارایی دەکرێت.

وۆرکشۆپەکە تیشکی خستە سەر میکانیزمەکانی بەهێزکردنی بەکارهێنانی ئارام و بەرپرسانەی پلاتفۆرمەکانی سۆشیاڵ میدیا، بەرەنگاربوونەوەی چەواشەکاری و گوتاری رق، کینە و ناوەڕۆکی زیانبەخش، لەگەڵ پەروەردەی میدیایی، سەلامەتی دیجیتاڵی و بوونیاتنانی تواناکان.

بەشداریی دامەزراوەی سەرۆک جەلال تاڵەبانی لە چوارچێوەی ئەو هەماهەنگییە هاوبەشەدایە لەگەڵ رێکخراوی یونسکۆ کە لەسەری رێککەوتوون بۆ جێبەجێکردنی بەرنامە، خولی مەشق و راهێنانی هاوبەش لەبوارەکانی: ژیریی دەستکردی بەرپرسانە، پەروەردەی میدیایی و زانیاری، ئاسایش و سەلامەتی دیجیتاڵی، ژینگە و گۆڕانی کەشوهەوا، بوونیاتنانی ئاشتی و پێکەوەژیان و بەهێزکردنی گەنجان.

دامەزراوەی سەرۆک جەلال تاڵەبانی جەختی کردەوە لە پەرۆشی خۆی بۆ بەردەوامبوونی هەماهەنگی لەگەڵ یونسکۆ و پەرەپێدانی بەرنامەی جۆری کە بەشداربن لە بوونیاتنانی تواناکان و بەرزکردنەوەی هۆشیاریی دیجیتاڵی، کلتووری ئاشتی و پێکەوەژیان لە عێراقدا.