سەرۆک کۆماری عێراق لەگەڵ دامەزراوەی سەرۆک جەلال تاڵەبانی تاوتوێی ئامادەکارییەکان بۆ یادی نۆیەمین ساڵیادی ژیانئاوایی سەرۆک مام جەلال دەکات

وەفدێکی دامەزراوەی سەرۆک جەلال تاڵەبانی و نووسینگەی سکرتارییەتی سەرۆک مام جەلال، چاویان کەوت بە فەخامەتی سەرۆک کۆماری عێراق بەڕێز نزار ئامێدی.

لەدیدارێکدا تاوتوێی ئەو ئامادەکارییانەیان کرد کە بۆ یادی نۆیەمین ساڵیادی ژیانئاوایی سەرۆک جەلال تاڵەبانی لە ئارادان، کە بڕیارە لە بەغدادی پایتەخت ساز بکرێت.

لەبەشێکی دیکەی دیدارەکەدا فەخامەتی سەرۆک کۆمار جەختی کردەوە لەسەر گرنگی یادکردنەوەی میراتە نیشتمانی و سیاسییەکەی سەرۆکی کۆچکردوو سەرۆک جەلال تاڵەبانی، وەک پیاوێکی دەوڵەت و کەسایەتییەکی نیشتمانی کۆکەرەوە، کە بە حیکمەتێکی سیاسیی چەسپاوەوە بەشداری کردووە لە چەسپاندنی گفتوگۆ و لێکتێگەیشتن و شەراکەت.

لەکۆتایی دیدارەکەدا سەرۆک کۆمار باسی لەوەش کرد کۆچی دوایی سەرۆک جەلال تاڵەبانی شوێنەوارێکی قووڵی لە کاروانی دەوڵەتی عێراق و ویژدانی عێراقییەکاندا بەجێهێشتووە.