لەم سۆنگەیەوە دامەزراوەکە پرۆژەیەکی درێژخایەنی هەیە بۆ کۆکردنەوەی ئەرشیف و چاوپێکەوتن لەگەڵ هەموو ئەو کەسانەی کە هاوڕێ و هاوخەباتی سەرۆک مام جەلال بوون، هەموو ئەوکەسانەش کە کاریان لەگەڵکردووە.
بەڕێز کاک حەمە سەعید مەلاکەریمی جاف، بیرەوەرییەکانی لەگەڵ سەرۆک مام جەلال بەشێکی گرنگە لە ئەرشیفی زارەکی ئەو مێژووە بۆیە تۆماردەکرێت و لەگەڵ بەڵگەنامەکان بەشێوەیەکی زانستی بە پاراستنی مافی خاوەندارێتی لەئەرشیفی دامەزراوەی سەرۆک جەلال تاڵەبانی دەپارێزرێت.
لە ئامانجە گرنگەکانی دامەزراوەی سەرۆک جەلال تاڵەبانی، پاراستن و کۆکردنەوەی ئەرشیفی سەرۆک جەلال تاڵەبانییە وەک دەستکەوتێکی نەتەوەیی و نیشتمانی.
بۆ ئەو مەبەستە بەشی ئەرشیفی دامەزراوە بە دروستکردنی رایەڵەیەکی فراوان لە ناوخۆی کوردستان، عێراق و پەیوەندییە نێودەوڵەتییەکان، کار لە سەر سێ بنەمای سەرەکی دەکات، بریتین لە: (کۆکردنەوە، پاراستن و پەرەپێدان).
قۆناغی یەکەم؛ مەبەست لە کۆکردنەوە دەستڕاگەیشتنە بە سەرجەم بابەتە ئەرشیفییەکان وەک (ڤیدیۆ، وێنە، نامە، بروسکە، بەڵگەنامە، دەستنووس، کتێب، نامیلکە، ڕۆژنامە، گۆڤار، نامە زانستییەکان و سەرجەم ئەو بابەتانەی، کە لە ماڵپەڕ و پلاتفۆرمە میدیاییەکان) لە سەر سەرۆک مام جەلال بڵاوکراونەتەوە.
ئەم کارەش لەڕێگەی سەرچاوەکانی کۆکردنەوەوە دەکرێت، کە بریتین لە: (ناوەندە میدیاییەکان: تەلەفزیۆن، ڕادیۆ، ڕۆژنامە، گۆڤار، ماڵپەڕەکان، ناوەندە کولتووری، ئەرشیفی، ئەکادیمییەکان، ناوەندە حکومییەکان، ڕێکخراوەکان، ناوەندە حیزبییەکان، ئەرشیفی کەسی و کتێبخانەکان) لەناوە و دەرەوەی کوردستان و عێراق، بە شێوەیەکی مەیدانی و زانستی کار بۆ کۆکردنەوەی دەکرێت.
قۆناغی دووەم؛ بریتییە لە ئەرشیفکردن و پاراستن، لەم قۆناغەدا سەرجەم بەرهەمە کۆکراوەکان کاری (پشکنین، ڕیکخستن، پۆلێنکردن، ناسنامەدارکردن و مێتاداتا)یان بۆ دەکرێت و بە نوێترین سیستمی بواری ئەرشیفکردن کاری لە سەر دەکرێت.
قۆناغی سێیەم؛ پەرەپێدانە مەبەست لەم قۆناغە ئامادەکردنی سەرجەم کۆکراوەکانە بۆ کاری توێژینەوەی زانستی لە لایەن توێژەر و ناوەندە ئەکادیمییەکان لە سەر ژیان، فیکر، سیاسەت و خەباتی سەرۆک جەلال تاڵەبانی. هەروەها لەبواری بەرهەمهێنانی میدیایی، فیلمسازی، بڵاوکردنەوەی کتێب سوودی لێ وەردەگیرێت. ئەم ئەرشیفە بەشێکی گرنگە لە ناسنامەی نەتەوەیی کورد و بەجیهانیکردنی یەکێکی ترە لە کارەکانی دامەزراوەکە. بۆ ئەم مەبەستەیش لەگەڵ ناوەندە ئەرشیفییە جیهانییەکان لە هەماهەنگیی بەردەوامداین بۆ بەدیهێنانی ئەو ئامانجە گرنگە، کە دەبێتە بناغەیەکی بەهێز بۆ دامەزراندنی ئەرشیفی نیشتمانی.
....