هێرۆخان ئەستێرەیەکی گەشی کوردایەتی

هێرۆخان خانمێک لە سەخترین کاتی مێژوودا دەرکەوت و خاوەندارێتی لە دۆزی رەوای گەلی کورد کرد.
هێرۆخان دوور لە سەیوانی حەوانەوە، ژیانی خەبات و تێکۆشانی سەختی هەڵبژارد. ژیانی تێکۆشانی کوردایەتی دیاری کرد. هاوەڵی بیروباوەڕی خەباتی سەرۆک مام جەلال بوو، هێرۆخان کەمی نەکرد ئامادەگی جدی هەبوو لە مەیدانی خەبات و تێکۆشاندا؛ دادەی کوردایەتی بووە سەرچاوەو ئیلهام بەخش بۆ بەشداری راستەقینەی ژنانی کورد لە شۆڕش و خەباتی نەتەوەیدا . بەهەر بارێکدا باس لەم کێوە بەهێزو بڵندە بکەیت؛ هەر کەمەو باسو خواستی زیاتر هەڵدەگرێت. لە شاخ هێرۆخان توانی وەک میدیاکارێکی سەردەمیانە گرنگی بە تۆماری ئەرشیفی شاخ و شۆڕشی نوێ بدات، کامێراکەی دەستی دادە هێرۆ گەواهیدەری تۆماری داستان و نەبەردی هێزی پێشمەرگەبوون، بەکارەکانی توانی زۆرێک لە تاوانەکانی بەعس لە بۆردومان و راگواستنی گوندەکان و کاولکاری دێهاتەکان و ژەهربارانکردن بە تۆپ و تەیارە تۆماربکات، هەرئەوتۆمارەش لە هەشتاکانی سەدەی رابردوودا لە میدیا جیهانییەکان بڵاوبوونەوەو رووی تاوانی بەعس دژ بەگەلی کورد لە جیهان زیاتر دەرکەوت کە رژێمێک لە دنیادا هەیەو بە قورسترین چەک دژ بە نەتەوەیەکی بن دەست لە وڵاتەکەی خۆی دەجەنگێت. 

لە ژیانی شاردا هێرۆخان سەرچاوەی گەورەترین شۆڕشی کلتوری و فەرهەنگی و رۆشنبیری بوو؛ لە دوای راپەڕین هێرۆخان بووە سەیوان بۆ کۆکردنەوەی چینی رۆشنبیرو هونەرمەندی کورد؛ کارەکانی مەدەنی و خزمەتی گەورەبوون بەنەتەوەی کورد؛ منداڵ پارێز ، پاراستنی شوێنەواری ئەم وڵاتەو ئەمنە سورەکەو خاک تیڤی و کوردسات و خەڵوەتگەی پیرو پشتگیری کردنی ناوەندەکانی زانست و زانیاری و کلتورو هونەرو رەسەنایەتی؛ ئەوکارەمەزنانەبوون کە تاهەتایە ناوی هێرۆخان گەش و دەدرەوشێنێتەوە.هێرۆخان سەرچاوەو چاوگی ئەو هەیەجانەبوو کە کۆمەڵگەی بەرەو مەدەنییەت دەبرد. زۆر عورفی نابەجێی لەگۆمەڵگە لەناوبرد لە رێی میدیاوەو بەردەوام خەمی هۆشمەندی تاکی کوردی بوو، رووبەڕووی نەریتە نەخوازراوە دواکەوتووەکانی کۆمەڵ بووە.

بۆ شاری سلێمانی هێرۆخان، سەرداری پێشکەوتنی شاربوو، جێنەبوو لەم شارەدا خزمەتی دادە هێرۆی پێنەگات. هێرۆخان تین و تاوی ئاوەدانی و حەسانەوەی گەل بوو، کارەکانی بەگەشی و درەوشاوەیی بۆ گەل دەمێننەوە.‏‎