سەرکردەیەکی کەم وێنەو بلیمەت و سەیوانی ئارامی

مام جەلال بەڕەحمەتبێت، هەر لە خۆی دەچوو بۆ کوردو عێراقییەکان سەیوانێکی دڵنیایی بوو .هەرلەبەر ئەوەش ناوی بە سەمامی ئەمان دەهات و رابەری ئاشتەوایی بوو، سەرۆک تاڵەبانی هەمووکات خاوەن پێگەبوو هەرچەندە خۆی لە ماڵباتێکی شێخی سەر بەتەکێی تاڵەبانی بوو بەڵام رێگەی سیاسەت و خەباتی هەڵبژارد.

 مام جەلال لەتەمەنێکی کەمدا بەشداری راستەقینەی سیاسەتی کردووە. رێگەو رێبازی مام جەلال جگەلەوەی خەتێکی بەهێزی کوردایەتییە بەڵام رێگەیەکی واڵاشە بۆ گەشەی دیموکراسی و مافی گەلان لە چوارچێوەی بەها باڵاکانی دیموکراسییەوە. 

تەنانەت لە شاخ مام جەلال خەباتی رەوای بۆ سەرخستنی دیموکراسی دەکردوو باوەڕی بەوەبوو هێڵی دیموکراسی؛ عێراق لە فاشیزم و دیکتاتۆرییەت رزگار دەکات دەیگەیەنێتە کەناری ئارام.

هەرواش دەرچوو لە دوای رووخانی رژێمی سەدام تەوژمی دیموکراسی فۆڕمی حکومڕانی لە عێراق گۆڕی و مۆدێلی دیموکراسی تەوافووقی لە عێراق توانی رۆڵ بە عێراقییەکان بدات. مام جەلال سەرکردەو رابەری راستەقینەی دیموکراسی تەوافووقی بوو کە هەمووجار نموونەی چەپکەگوڵێکی رەنگاو رەنگی دەهێنایەوە.

مام جەلال نەی دەویست حەقیی هیچ گروپێک نادیدەبگیرێت و باوەڕی بە پەراويزخستن نەبوو . لە ماوەی سەردەمی سەرۆکایەتی خۆیدا توانی قورسترین سەردەمی سیاسی عێراقی نوێ تێبپەڕێنێت.

مام جەلالی رابەری دیموکراسی بووە سەیوانی هەموو عێراقییەکان و ماڵەکەی خۆشی کردە جێگەی ئاشتەوایی گشت ناکۆکەکان. 
عێراقی بێ مام جەلال عێراقێکی بێ سێبەرو سەیوانە و پڕ گرفتارییە.
سەرۆک مام جەلال زۆرکات بە نوکتەیەکی خۆش تەنگەژەکانی تێپەڕدەکرد.

مام جەلال رۆحی شاد جێگەی پڕنابێتەوە.. بەڵام رێبازەکەی حیکمەتەکانی تیماری برینە قوڵەکانی ئەم سەردەمی ناتەباییە.