نامیلکەی مورافەعە

نامیلکەی (مام جەلال؛ لە پەراوێزی ئەدەبیاتی مورافەعەی کەرکوکەوە) لەلایەن (ستران عەبدوڵڵا)ەوە نووسراوە، ناونیشانی سێیەم نامیلکەی زنجیرەی هۆشیاریی حزبییە و بۆردی هۆشیاری لە مەکتەبی راگەیاندن و هۆشیاری یەکێتیی نیشتمانیی کوردستان چاپ و بڵاوی کردۆتەوە. نامیلکەکە تێکڕا 34 لاپەڕەیە و لە 10 باس و ناونیشان پێکهاتووە. هەر باسێکی نامیلکەکە، لایەنێکی مورافەعە گەورەکەی سەرۆک مام جەلال نیشان دەدات، کە لە 9/2/2004 لە ئەنجوومەنی حوکم خستیەڕوو و جارێکی تر بە رەسمی و لەبەرچاوی ئەندامانی ئەنجوومەنەکە، کوردستانیبوونی کەرکوکی سەلماند.

نووسەر لەم نامیلکەیەدا، ئاماژە بەوە دەکات، سەرۆک مام جەلال لە ماوەی خەباتی دەیان ساڵەی خۆیدا، لە چەند وێستگەیەکی جیاواز و جۆراوجۆردا، کاری لەسەر پڕۆژەکەی کردووە و بەڵگە و ئارگۆمێنتی لەسەر کوردستانیبوونی کەرکوک کۆکردۆتەوە. هەروەها لە چەند بۆنە و کۆبوونەوەیەکدا، سەرۆک مام جەلال کوردستانیبوونی کەرکوکی سەلماندووە و بەڵگەی پێویستی خستووەتەڕوو. وەک لە گفتوگۆی ساڵی 1984 لەنێوان شۆڕش و حکومەتی عیراق. هەروەها زۆرجاریش لە کۆڕ و کۆبوونەوە حزبییەکان و دەرفەتە میدیاییەکاندا، سەرۆک مام جەلال بەشێک لە بەڵگەکانی کوردستانیبوونی کەرکوکی خستۆتە بەرچاو.
لە بەشێکی دیکەی ناوەڕۆکی ئەم نامیلکەیەدا، تیشک خراوەتە سەر لایەنێکی تری ئەندێشەی سەرۆک مام جەلال، ئەویش بریتییە لە یەکپارچەیی و یەکێتیی کوردستان، بۆ نموونە کاتێک باس لە هەرێمی کوردستان لە چوارچێوەی دەوڵەتی عیراقی فیدراڵ دەکرێت، مام جەلال داوا دەکات هەرێمی کوردستان سنووری هەموو کوردستانی باشوور بە کەرکوک و ناوچە دابڕێنراوەکانەوە بگرێتەوە.

هاوکات ئەم نامیلکەیە ئەوەش روون دەکاتەوە، چۆن مورافەعەکەی مام جەلال بۆتە بەشێک لە جموجووڵە سیاسیی و یاساییەکانی عیراق و هەرێمی کوردستان. هەروەها چۆن هەوڵەکانی مام جەلال بووە بە سەرچاوەی چەسپاندنی چەند بڕگە و ماددەیەک لە دەستووری عیراقدا.
رۆژنامەی کوردستانی نوێ